• ឥណ្ឌារកឃើញករណី «វិជ្ជមានដំបូង» នៃមេរោគបំប្លែងថ្មី «អូមីក្រុង» ខណៈអ្នកជំនាញប្រទេសនេះថា វាទំនងជាមិនខ្លាំងដូច Delta ឡើយ

    (ញូដេលី)៖ ប្រទេសឥណ្ឌាបានប្រកាសរកឃើញករណី «វិជ្ជមានដំបូង» នៃវីរុសបំប្លែងថ្មី អូមីក្រុង (Omicron) លើបុរសពីរនាក់នៅក្នុងរដ្ឋ កាណាតាកា (Karnataka) ភាគខាងត្បូងប្រទេស ខណៈបណ្តាប្រទេសផ្សេងទៀតដូចជា សិង្ហបុរី កូរ៉េខាងត្បូង ក្រិក ហ្វាំងឡង់ និងហ្គាណាជាដើម សុទ្ធតែបានប្រកាសរកឃើញករណី «វិជ្ជមាន» ដំបូងៗនៃវីរុសបំប្លែងថ្មីនេះដូចគ្នា។ នេះបើតាមការចេញផ្សាយដោយ ទីភ្នាក់ងារសារព័ត៌មាន Reuters នាព្រឹកថ្ងៃសុក្រ ទី០៣ ខែវិច្ឆិកា ឆ្នាំ២០២១។

    ស្របពេលដែលពិភពលោក កំពុងភ័យខ្លាចការរាតត្បាតនៃមេរោគបំប្លែងថ្មី Omicron នោះ អ្នកជំនាញល្បីឈ្មោះម្នាក់របស់ឥណ្ឌាបានលើកឡើងប្រាប់សារព័ត៌មាន Bloomberg កាលពីថ្ងៃព្រហស្បតិ៍សប្តាហ៍នេះថា Omicron ទំនងជាមិនអាចបង្កបញ្ហាចំពោះឥណ្ឌា ខ្លាំងដូចជាវីរុស Delta នោះឡើយ។ បន្ថែមពីនេះ ឥណ្ឌាក៏បាននិងកំពុងជំរុញល្បឿន នៃការចាក់វ៉ាក់សាំងបង្ការ COVID-19 នៅទូទាំងប្រទេសផងដែរ ដោយគិតត្រឹមពេលនេះ មនុស្សពេញវ័យសរុប ៤៥៤លាននាក់ ឬស្មើនឹង ៣២.៩% នៃចំនួនប្រជាជនសរុប (១.២៥ពាន់លាននាក់) បានទទួលការចាក់គ្រប់ដូស។

    បើតាមអង្គការសុខភាពពិភពលោក (WHO) វីរុសបំប្លែងថ្មី Omicron បានឆ្លងកាត់ការបំប្លែងខ្លួនច្រើនដងបំផុត បើធៀបនឹងមេរោគ COVID-19 បំប្លែងខ្លួនមុនៗដែលយើងធ្លាប់បានស្គាល់ ហើយបានចាត់ទុកវាជាវីរុសស្ថិតក្នុងក្តី «ព្រួយបារម្ភ» ខណៈការស្វែងយល់អំពីឥទ្ធិពលពិតប្រាកដរបស់វា នៅតែកំពុងបន្តនៅឡើយ។ សម្រាប់ឥណ្ឌាផ្ទាល់ កាលពីដើមសប្តាហ៍នេះ ក៏បានដាក់ចេញនូវវិធានការរឹតត្បិតលើអ្នកដំណើរ មកពីតំបន់អាហ្វ្រិកខាងត្បូងរួចរាល់ហើយដែរ៕

    ហាមដាច់ខាតការយកអត្ថបទពីវេបសេយ www.baykdang.com ដោយគ្មានការអនុញ្ញាតិ។ បើលោកអ្នក ត្រូវការអត្ថបទ សូម inbox ទៅហ្វេសប៊ុកផេច [email protected]

    ព័ត៌មានទាក់ទង៖

  • ព័ត៌មានថ្មីៗ