ភ្នំពេញ៖ ជាការពិតណាស់ ! ឪពុកម្តាយភាគច្រើន តែងតែអប់រំប្រៀនប្រដៅកូនៗរបស់ពួកគេ ឲ្យដើរតាមផ្លូវត្រឹមត្រូវក្នុងសង្គម ដោយជៀសវាងឲ្យឆ្ងាយពីការប្រព្រឹត្តនូវអំពើមិនល្អផ្សេងៗ ក្នុងនោះដូចជា ការផឹកស៊ី ឬ ជក់គ្រឿងញៀនតាមគ្នីគ្នាជាដើម ។
យ៉ាងណាមិញ វីដេអូមួយបានបង្កឲ្យមានការរិះគន់យ៉ាងខ្លាំង ចំពោះទង្វើនៃការសប្បាយផឹកស៊ីជួបជុំ គ្មានការពិចារណារបស់មនុស្សចាស់មួយក្រុម ដែលអាចជាឪពុកម្តាយ ឬជាពូមីង បានជំរុញឲ្យក្មេងៗស្រីអាយុប្រមាណ ៥ ទៅ ៦ ឆ្នាំ ផឹកស្រាទាំងបង្ខំ ។
នេះជាសកម្មភាពបង្រៀនក្មេងឲ្យចេះផឹកគ្រឿងស្រវឹងដ៏ហួសចិត្តមួយ ដែលមិនត្រឹមតែធ្វើឲ្យពួកគេញៀនទេ តែថែមទាំងប៉ះពាល់ខ្លាំងដល់សុខភាព និងអនាគតរបស់ពួកគេនៅថ្ងៃខាងមុខ ។
ជាមួយនឹងទង្វើដែលចាត់ទុកឆ្កួតឡប់របស់មនុស្សចាស់ទាំងនេះ បងប្អូនអ្នកលេងហ្វេសប៊ុក មនុស្សមួយចំនួនបានស្នើ ដល់អាជ្ញាធរមូលដ្ឋាន ដែលបានឃើញវីដេអូនេះហើយ សូមចុះទៅធ្វើការអប់រំដល់ពួកគាត់ផង ដើម្បីកុំឲ្យរូបភាពមិនគួរគប្បីនេះ ជះឥទ្ធិពលដ៏អាក្រក់ដល់សង្គម។
ប៉ុន្តែទោះយ៉ាងណា គេពុំដឹងថា ការផឹកស៊ីនោះ កើតឡើងនៅភូមិ ឃុំ ស្រុក ខេត្តណា និងតាំងពីពេលណានោះទេ គ្រាន់តែឃើញឃ្លីបវីដេអូនេះ ត្រូវបានបង្ហោះផ្សព្វផ្សាយ បន្តគ្នាលើបណ្តាញសង្គមហ្វេសប៊ុក៕
