(បរទេស)៖ កាលពីពេលថ្មីៗនេះកំពូលមហាសេដ្ឋីលំដាប់ពិភពលោក លោក Elon Musk បានលើក ថា លោកមានបំណងច្រានចោលការហាមឃាត់របស់ Twitter ទៅលើអតីតប្រធានាធិបតីអាមេរិក លោក Donald Trump និងមានបំណងបើកគណនី Twitter នេះឡើងវិញផងដែរ។នេះបើយោងតាមការចេញផ្សាយរបស់សារព័ត៌មាន Reuters នៅថ្ងៃទី១១ ខែឧសភា ឆ្នាំ២០២២។

Musk បានលើកឡើងនៅក្នុងកិច្ចប្រជុំកំពូលមួយដែលរៀបចំដោយ Financial Time ដោយបង្ហាញថា លោកនឹងអនុញ្ញាតឱ្យអតីតប្រធានាធិបតី Donald Trump អាចប្រើប្រាស់គណនី Twitter របស់លោកឡើងវិញបាននៅពេលដែលលោកបានកាន់កាប់បណ្តាញសង្គមនេះ។ ខណៈដែលលោក Trump ត្រូវបានហាមឃាត់ជាអចិន្ត្រៃយ៍ពី Twitter បន្ទាប់ពីការវាយប្រហារដោយអ្នកគាំទ្ររបស់លោកទៅលើវិមាន Capitol របស់សហរដ្ឋអាមេរិក។ ទើបបណ្តាលឱ្យ Twitter សម្រេចចិត្តបិទគណនីនេះជាអចិន្ត្រៃយ៍តែម្តងបន្ទាប់ពីកុបកម្មនៅថ្ងៃទី០៦ ខែមករា ឆ្នាំ២០២១ ដោយលើកឡើងពីហានិភ័យនៃការញុះញង់ឱ្យកើតមានអំពើហិង្សា។

យ៉ាងណាមិញ Musk បានកត់សម្គាល់ថាចាប់តាំងពីពេលនោះមក Trump បានងាកទៅរកការប្រើប្រាស់ Platform Truth Social ដែលត្រូវបានបង្កើតឡើងដោយ Trump Media & Technology Group។ ហើយបន្ទាប់ពី Musk ទិញយក Twitter លោក Trump បានលើកឡើងថាលោកនឹងនៅតែមិនពិចារណាត្រឡប់ទៅប្រើប្រាស់បណ្តាញសង្គមនោះវិញ បើទោះបីជាគណនីរបស់លោកត្រូវបានបើកឱ្យប្រើវិញក៏ដោយ។

ផ្ទុយទៅវិញ Trump បានប្រាប់ Fox News កាលពីខែមុនថា ចំនួនអ្នកប្រើប្រាស់នៅលើ Truth Social កំពុងកើនឡើង ថែមទាំងសរសើរថា Platform របស់លោកគឺ «ប្រសើរជាងនៅលើ Twitter» ថែមទៀតផង។ ដោយក្នុងលោក Trump ក៏បានបញ្ជាក់យ៉ាងច្បាស់ដែរថា ទោះជាយ៉ាងណាក៏ដោយលោកនឹងមិនត្រឡប់ទៅប្រើ Twitter វិញនោះទេ៕