(បាសេឡូណា)៖ នាយកប្រតិបត្តិ (CEO) ក្លិបបាល់ទាត់ FC Barcelona លោក Ferran Reverter បានបញ្ជាក់ប្រាប់ទៅកាន់លោកប្រធានក្លិប លោក Joan Laporta ពីគោលបំណងរបស់លោក ក្នុងការលាលែងពីតំណែងដោយសារហេតុផលផ្ទាល់ខ្លួន។ នេះបើតាមក្លិបលេងនៅលីគ La Liga ហើយត្រូវបានចុះផ្សាយដោយសារព័ត៌មាន CNA នាថ្ងៃទី០៩ ខែកុម្ភៈ ឆ្នាំ២០២២។

លោក Reverter ត្រូវបានតែងតាំងជានាយកប្រតិបត្តិកាលពីខែកក្កដា ហើយបានចូលរួមចំណែកនៅក្នុងការដោះស្រាយបញ្ហាបំណុល និងកាត់បន្ថយការចំណាយរបស់ក្លិបកន្លងមក។

«មកទល់ពេលនេះ វាមានរយៈពេលជិត ១ឆ្នាំហើយចាប់តាំងពីខ្ញុំបានចាកចេញពីអាល្លឺម៉ង់មកកាន់ Barcelona សម្រាប់ហេតុផលគ្រួសារ ហើយភ្លាមៗ បន្ទាប់ពីខ្ញុំទទួលយកការផ្តល់ឲ្យដែលខ្ញុំបានទទួលពីលោកប្រធាន Joan Laporta ដើម្បីក្លាយខ្លួនជា CEO របស់ក្លិប» នេះបើតាមលោក Reverter បានឲ្យដឹងនៅក្នុងសេចក្តីថ្លែងការណ៍។

«សម្រាប់ខ្លួនខ្ញុំផ្ទាល់ ខ្ញុំបានខិតខំប្រឹងប្រែង និងលះបង់ច្រើននៅអំឡុងពេលប៉ុន្មានខែមកនេះ ប៉ុន្តែឥឡូវខ្ញុំចង់ផ្តោតលើហេតុផលដែលខ្ញុំវិលត្រឡប់មកកាន់ Barcelona វិញ នោះគឺចំណាយពេលវេលាកាន់តែច្រើនលើគម្រោងផ្ទាល់ខ្លួន និងគ្រួសាររបស់ខ្ញុំ»។

ក្លិប Barca បានឲ្យដឹងថា ការលាលែងពីតំណែងនេះ នឹងមានប្រសិទ្ធភាពកាន់តែឆាប់តាមដែលអាចធ្វើទៅបាន នៅពេលដែលពួកគេ តែងតែងនាយកប្រតិបត្តិថ្មី។

សូមជម្រាបថា Barcelona កំពុងឈរនៅលំដាប់ទី៤ ក្នុងលីគ La Liga មាន ១៥ពិន្ទុនៅពីក្រោយក្រុមកំពូលតារាង Real Madrid៕