• រដ្ឋមន្ត្រីអេមីរ៉ាតអារ៉ាប់រួមថា ក្រុមប្រទេស OPEC+ តែម្នាក់ឯងមិនអាចដោះស្រាយបញ្ហាផ្គត់ផ្គង់ប្រេងពិភពលោកបានទេ

    (អាប៊ុយដាប៊ី)៖ រដ្ឋមន្ត្រីក្រសួងថាមពលរបស់ប្រទេសអេមីរ៉ាតអារ៉ាប់រួមបានឱ្យដឹងថា អង្គការប្រទេសនាំចេញប្រេង និងប្រទេសសម្ព័ន្ធមិត្តរបស់ខ្លួន ដែលហៅកាត់ថា OPEC+ កំពុងបង្កើនការផលិតប្រេង ប៉ុន្តែមិនអាចដោះស្រាយបញ្ហាទាំងអស់របស់វិស័យនេះតែម្នាក់ឯងបានទេ។ នេះបើយោងតាមទីភ្នាក់ងារព័ត៌មាន Bloomberg។

    ទីភ្នាក់ងារព័ត៌មាន Bloomberg បានរាយការណ៍ដោយស្រង់កាសែត WAM របស់ប្រទេសអេមីរ៉ាតអារ៉ាប់រួមថា លោក Suhail Al-Mazrouei រដ្ឋមន្ត្រីក្រសួងថាមពលរបស់ប្រទេសអេមីរ៉ាតអារ៉ាប់រួមបានថ្លែងថា ឧស្សាហកម្មប្រេងត្រូវការការវិនិយោគ តាមរយៈការធ្វើការងាររួមគ្នារបស់ក្រុមហ៊ុនប្រេងអន្តរជាតិនានា ដើម្បីផ្តល់ការផ្គត់ផ្គង់គ្រប់គ្រាន់។

    លោករដ្ឋមន្ត្រីបានព្រមានថា ការខកខានមិនបានផ្តល់មូលធនគ្រប់គ្រាន់អាចនាំទៅរកការកើនឡើងតម្លៃប្រេងនាពេលអនាគត។

    តម្លៃប្រេងឆៅបានឡើងថ្លៃដល់កម្រិតខ្ពស់បំផុតក្នុងរយៈពេល ៧ឆ្នាំ គឺលើ ៨៩ដុល្លារក្នុងមួយបារ៉ែលក្នុងទីក្រុងឡុងដ៍នៅថ្ងៃពុធ ខណៈដែលតម្រូវការប្រេងក្នុងពិភពលោកស្ទុះងើបឡើងវិញពីការរាតត្បាតជំងឺកូវីដ ហើយការផ្គត់ផ្គង់ត្រូវបានរារាំងដោយការអាក់ខានមួយចំនួន។ វាគឺជាបញ្ហាប្រឈមដែលកំពុងកើនឡើងសម្រាប់អ្នកប្រើប្រាស់ ខណៈដែលពួកគេប្រឈមនឹងអតិផរណា។

    ទីភ្នាក់ងារព័ត៌មាន Bloomberg បានរាយការណ៍ទៀតថា កត្តាចូលរួមចំណែកដ៏ធំមួយទៅនឹងកំណើនតម្លៃប្រេងគឺការខកខានរបស់ប្រទេសជាច្រើននៃសមាជិកក្រុមប្រទេស OPEC+ ក្នុងការស្តារទិន្នផលប្រេងឡើងវិញ ដែលបានផ្អាកផលិតកម្មក្នុងអំឡុងពេលមានការរាតត្បាតជំងឺកូវីដ-១៩។ យោងតាមទីភ្នាក់ងារថាមពលអន្តរជាតិ (IEA) ក្រុមប្រទេស OPEC+ បានបង្កើនផលិតកម្មប្រេងតែ ៦០ភាគរយប៉ុណ្ណោះនៃកម្រិតបង្កើនដែលបានកំណត់របស់ខ្លួនកាលពីខែមុន។ ប៉ុន្តែការធ្លាក់ចុះការចំណាយក៏ជាបញ្ហាមួយផងដែរសម្រាប់ឧស្សាហកម្មពិភពលោក ដោយសារការធ្លាក់ចុះតម្លៃប្រេងខ្លាំងកាលពីឆ្នាំ២០២០ ហើយខណៈដែលវិនិយោគិនបង្វែរប្រាក់ចេញពីវិស័យផូស៊ីលឥន្ធនៈ។

    លោក Mazrouei បានថ្លែងថា ប្រទេសអេមីរ៉ាតអារ៉ាប់រួម នៅតែប្តេជ្ញាចិត្តចំពោះការបង្កើនទិន្នផលប្រេងរបស់ខ្លួនដដែល ដែលជាផ្នែកមួយនៃកិច្ចព្រមព្រៀងរបស់ក្រុមប្រទេស OPEC+៕

    ហាមដាច់ខាតការយកអត្ថបទពីវេបសេយ www.baykdang.com ដោយគ្មានការអនុញ្ញាតិ។ បើលោកអ្នក ត្រូវការអត្ថបទ សូម inbox ទៅហ្វេសប៊ុកផេច [email protected]

    ព័ត៌មានទាក់ទង៖

  • ព័ត៌មានថ្មីៗ