• តាលីបង់ ប្តេជ្ញាធ្វើការងារជាមួយរុស្ស៉ី និងប្រទេសក្នុងតំបន់ ដើម្បីប្រយុទ្ធប្រឆាំងក្រុម ISIS

    (ម៉ូស្គូ)៖ ក្រុមតាលីបង់នៅថ្ងៃពុធសប្ដាហ៍នេះ បានយល់ព្រមធ្វើការជាមួយប្រទេសរុស្ស៉ី ចិន និងអ៉ីរ៉ង់ស្តីពីបញ្ហាសន្តិសុខក្នុងតំបន់ បន្ទាប់ពីវិមានក្រឹមឡាំងបានព្រមាន អំពីការកើនឡើងឥទ្ធិពលនៃក្រុមភេរវករ ISIS និងការគំរាមកំហែងការជួញដូរគ្រឿងញៀន បន្ទាប់ពីការក្តោបក្តាប់អំណាចរបស់តាលីបង់ នៅប្រទេសអាហ្វហ្គានីស្ថាន។ នេះបើតាមការចេញផ្សាយដោយ ទីភ្នាក់ងារសារព័ត៌មាន AFP នៅព្រឹកថ្ងៃព្រហស្បតិ៍ ទី២១ ខែតុលា ឆ្នាំ២០២១។

    ក្នុងអំឡុងកិច្ចពិភាក្សានៅទីក្រុងម៉ូស្គូ ប្រទេសរុស្ស៉ី គឺជាការលេចមុខជាអន្តរជាតិ កម្រិតខ្ពស់ដំបូងរបស់ក្រុមតាលីបង់ ចាប់តាំងពីពួកគេបានឡើងកាន់អំណាច កាលពីខែសីហាកន្លងទៅនេះ ហើយប្រទេសចំនួន ១០ បានអំពាវនាវឱ្យមានជំនួយមនុស្សធម៌ជាបន្ទាន់ សម្រាប់ប្រទេសអាហ្វហ្គានីស្ថាន និងបានអះអាងថា ប្រទេសដែលទើបតែដកកងទ័ពចេញពីអាហ្វហ្គានីស្ថាន គួរតែផ្តល់មូលនិធិដល់កិច្ចខិតខំប្រឹងប្រែង កសាងប្រទេសនេះឡើងវិញ។

    គួរបញ្ជាក់ថា កិច្ចពិភាក្សាខាងលើនេះបានកើតឡើង បន្ទាប់ពីប្រធានាធិបតីរុស្ស៉ី លោក វ្ល៉ាឌីមៀ ពូទីន បានព្រមានថា ក្រុមភេរវករ ISIS កំពុងប្រមូលផ្តុំគ្នានៅភាគខាងជើងប្រទេសអាហ្វហ្គានីស្ថាន និងបានបង្កការបំផ្ទុះគ្រាប់បែកជាច្រើនករណីរួចទៅហើយ។

    នៅក្នុងសេចក្តីថ្លែងការណ៍រួមមួយ ចេញនៅថ្ងៃពុធសប្ដាហ៍នេះ ប្រទេសទាំង ១០ ដែលចូលរួមក្នុងកិច្ចសន្ទនានៅទីក្រុងម៉ូស្គូ បានលើកឡើងពីការព្រួយបារម្ភ អំពីសកម្មភាពរបស់ក្រុមភេរវករ ហើយបានបញ្ជាក់ជាថ្មីពី «ឆន្ទៈ» របស់ពួកគេក្នុងការបន្តលើកកម្ពស់សន្តិសុខ នៅក្នុងប្រទេសអាហ្វហ្គានីស្ថាន ដើម្បីរួមចំណែកដល់ស្ថិរភាពក្នុងតំបន់ទាំងមូល។ រដ្ឋមន្ត្រីការបរទេសរុស្ស៉ី លោក សឺហ្គៃ ឡាវរ៉ូវ (Sergei Lavrov) បាននិយាយថា ទាំងក្រុមសកម្មប្រយុទ្ធ ដែលមានទំនាក់ទំនងជាមួយក្រុម ISIS និងក្រុមអាល់កៃដា (al-Qaeda) បាននិងកំពុងព្យាយាមបង្កអសន្តិសុខ នៅក្នុងប្រទេសអាហ្វហ្គានីស្ថានហើយ៕

    ហាមដាច់ខាតការយកអត្ថបទពីវេបសេយ www.baykdang.com ដោយគ្មានការអនុញ្ញាតិ។ បើលោកអ្នក ត្រូវការអត្ថបទ សូម inbox ទៅហ្វេសប៊ុកផេច [email protected]

    ព័ត៌មានទាក់ទង៖

  • ព័ត៌មានថ្មីៗ