• វ៉ាក់សាំងចិន ចំនួន៣លានដូសថ្មីទៀតដែលជាការបញ្ជាទិញរបស់កម្ពុជា នឹងត្រូវដឹកមកដល់នៅថ្ងៃស្អែកនេះ

    (ភ្នំពេញ)៖ វ៉ាក់សាំងបង្ការជំងឺកូវីដ១៩ របស់ចិន ប្រភេទស៊ីណូវ៉ាក់ (Sinovac) ចំនួន៣លានដូសថ្មីទៀត ដែលជាការបញ្ជាទិញរបស់រដ្ឋាភិបាល នឹងត្រូវដឹកមកដល់កម្ពុជា នៅព្រឹកថ្ងៃទី២៤ ខែកញ្ញា ឆ្នាំ២០២១ស្អែកនេះ។ នេះបើតាមការបញ្ជាក់របស់មន្រ្តីជាន់ខ្ពស់ក្រសួងសុខាភិបាល ដល់បណ្តាញព័ត៌មាន។

    រាជរដ្ឋាភិបាលកម្ពុជា បានស្វះស្វែងយ៉ាងខ្លាំងក្នុងការស្វែងរកវ៉ាក់សាំងមកចាក់ជូនប្រជាពលរដ្ឋឥតគិតថ្លៃ ក្នុងនោះប្រទេសចិន ត្រូវបានសម្តេចតេជោ ហ៊ុន សែន កំណត់ជាបង្អែកយុទ្ធសាស្ត្រ ក្នុងការផ្គត់ផ្គង់វ៉ាក់សាំងនេះ។

    ដោយបូកបញ្ចូលនូវវ៉ាក់សាំងមកដល់ស្អែកនេះ កម្ពុជាបានទទួលវ៉ាក់សាំងបង្ការជំងឺកូវីដ១៩ ជាង៣០លានដូសហើយ ដើម្បីចាក់ជូនប្រជាពលរដ្ឋ ក្នុងនោះប្រទេសចិនបានផ្គត់ផ្គត់វ៉ាក់សាំងដល់កម្ពុជាច្រើនជាងគេបង្អស់។ ក្រៅពីនោះមានអង្គការសុខភាពពិភពលោក តាមរយៈយន្តការខូវ៉ាក់ ប្រទេសជប៉ុន អង់គ្លេស និងសហរដ្ឋអាមេរិកតាមរយៈខូវ៉ាក់ផងដែរ។

    វត្តមានវ៉ាក់សាំងចិននេះ ចំពេលដែលកម្ពុជា កំពុងបើកយុទ្ធនាការថ្មីក្នុងការចាក់វ៉ាក់សាំងបង្ការជំងឺកូវីដ១៩ ជូនកុមារអាយុ៦ឆ្នាំ ដល់១២ឆ្នាំ ដែលធ្វើឡើងចាប់ពីថ្ងៃទី១៧ ខែកញ្ញា ឆ្នាំ២០២១។

    សម្តេចតេជោ ហ៊ុន សែន នាយករដ្ឋមន្ដ្រីនៃកម្ពុជា នៅថ្ងៃទី១៧ ខែកញ្ញា ឆ្នាំ២០២១នេះ បានថ្លែងឲ្យដឹងថា កម្ពុជាមានវ៉ាក់សាំងការពារកូវីដ១៩ ទាំងនៅក្នុងស្តុកបូករួម នឹងមកដល់នៅពេលឆាប់ៗខាងមុខ សរុបរហូតដល់១៣លានដូស។ វ៉ាក់សាំងចំនួន១៣លានដូសរួមមាន នៅក្នុងស្តុកជាង៤លានដូស និង៦លានដូស ដែលជាការបញ្ជាទិញ ពីក្រុមហ៊ុនស៊ីណូវ៉ាក់របស់ចិន និង៣លានដូសទៀត គឺជាការសន្យាផ្តល់ជំនួយពីមិត្តចិន ក្នុងដំណើរទស្សនកិច្ចរបស់លោក វ៉ាង យី រដ្ឋមន្ត្រីការបទេសចិន កាលពីពេលថ្មីៗនេះ។

    រហូតដល់ពេលនេះ ដោយគិតត្រឹមថ្ងៃទី២១ ខែកញ្ញា ក្រសួងសុខាភិបាល និងក្រសួងការពារជាតិ បានចាក់វ៉ាក់សាំងការពារកូវីដ១៩ ជូនមន្រ្តីរាជការ ប្រជាពលរដ្ឋ និងកងកម្លាំងប្រដាប់អាវុធ នៅទូទាំងប្រទេសសរុបចំនួន ១២,៤៨៣,៥៨៨នាក់ហើយ។ ក្នុងរួមមាន៖ ១៖ មនុស្សចាប់ពីអាយុ១៨ឆ្នាំឡើង ៩,៨៤២,៩៩៨នាក់ ២៖ កុមារ និងក្មេងជំទង់ចាប់ពីអាយុ១២ដល់១៨ឆ្នាំ ១,៧៣៧,៣០៣នាក់ និង៣៖ កុមារចាប់ពីអាយុ០៦ដល់១២ឆ្នាំ ៩០៣,២៨៧នាក់៕

    ហាមដាច់ខាតការយកអត្ថបទពីវេបសេយ www.baykdang.com ដោយគ្មានការអនុញ្ញាតិ។ បើលោកអ្នក ត្រូវការអត្ថបទ សូម inbox ទៅហ្វេសប៊ុកផេច [email protected]

    ព័ត៌មានទាក់ទង៖

  • ព័ត៌មានថ្មីៗ