(អាមេរិក)៖ កម្មវិធី WhatsApp ដែលមាន Facebook ជាមេធំ ត្រូវបានគេរាយការណ៍មកថា ត្រូវបានផាកពិន័យជាប្រាក់ ២២៥លានអឺរ៉ូ (២៦៧លានដុល្លារអាមេរិក) ដោយសារតែបានរំលោភលើច្បាប់ ឯកជនភាពរបស់សហភាពអឺរ៉ុប។ នេះបើយោងតាមការចេញផ្សាយរបស់ សារព័ត៌មាន CNBC នៅថ្ងៃទី០៣ ខែកញ្ញា ឆ្នាំ២០២១។

គណៈកម្មការការពារទិន្នន័យរបស់អៀរឡង់ បាននិយាយនៅថ្ងៃព្រហស្បតិ៍ថា WhatsApp មិនបានប្រាប់ពលរដ្ឋសហភាពអឺរ៉ុប ឱ្យបានគ្រប់គ្រាន់អំពីអ្វីដែល WhatsApp បានធ្វើជាមួយនឹងទិន្នន័យផ្ទាល់ខ្លួនរបស់អ្នកប្រើប្រាស់។ មានន័យថា WhatsApp បានយកទិន្នន័យ របស់អ្នកប្រើប្រាស់ទៅប្រើក្នុងផ្លូវផ្សេង ដោយគ្មានបានជូនដំណឹង ឬមានការយល់ព្រមពីសំណាក់អ្នកប្រើប្រាស់ឡើយ។

គណៈកម្មការការពារទិន្នន័យរបស់អៀរឡង់បានបញ្ជាក់បន្ថែមទៀតថា បច្ចុប្បន្ននេះអ្នកប្រើប្រាស់ WhatsApp មានប្រមាណជា ២ពាន់លាន នាក់ ហើយក៏កំពុងត្រូវបាន WhatsApp ធ្វើការចែករំលែកទិន្នន័យផ្ទាល់ខ្លួនរបស់ពួកគេជាមួយនឹង Facebook តាមរយ:ការផ្លាស់ប្ដូរគោល ការណ៍ថ្មី ប៉ុន្តែតាមពិតទៅ WhatsApp មិនមែនត្រឹមតែចែករំលែកទិន្នន័យរបស់អ្នកប្រើជាមួយ Facebook ប៉ុណ្ណោះទេ នៅមានការប្រើ ក្នុង ផ្លូវផ្សេងទៀត។

គួរបញ្ជាក់ផងដែរថា គោលការណ៍ថ្មីរបស់ WhatsApp បានធ្វើឱ្យប៉ះពាល់ដល់អារម្មណ៍អ្នកប្រើជាច្រើន និងមានអ្នកខ្លះបានងាកទៅប្រើ កម្មវិធី ផ្សេងជំនួសវិញ ប៉ុន្តែព័ត៌មានចុងក្រោយបានបង្ហាញថា WhatsApp ប្រហែលជាអនុវត្តគោលការណ៍ថ្មីតែជាមួយនឹងគណនី WhatsApp Business ប៉ុណ្ណោះ៕