• ទេសរដ្ឋមន្ត្រី ស៊ុន ចាន់ថុល៖ បើចង់ក្លាយជាអ្នកដឹកនាំបម្រើជាតិប្រកបដោយប្រសិទ្ធភាព ត្រូវប្រែក្លាយខ្លួនជាអ្នកចេះដឹងទូទៅ កុំធ្វើត្រឹមតែជាអ្នកជំនាញ

    (ភ្នំពេញ)៖ លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានថ្លែងថា បើយើងចង់ក្លាយខ្លួន ជាអ្នកដឹកនាំក្នុងការបម្រើប្រទេសជាតិ ប្រកបដោយប្រសិទ្ធភាព យើងត្រូវមានបទពិសោធន៍ច្រើន ត្រូវមានភាពក្លាហាន ត្រូវខិតខំស្រូបយកចំណេះវិជ្ជាអំពីការងារផ្សេងៗគ្នាកុំឱ្យនៅមួយកន្លែង ជាពិសេសត្រូវប្រែក្លាយខ្លួនឱ្យទៅជាអ្នកចេះដឹងទូទៅ (Generalist) កុំធ្វើត្រឹមតែជាអ្នកជំនាញ (Specialist) និងត្រូវយល់គ្រប់ចំណែកទាំងអស់នៃការងារ។

    លោកទេសរដ្ឋមន្ត្រី ស៊ុន ចាន់ថុល បានបញ្ជាក់ដូចនេះនាថ្ងៃទី២៦ ខែសីហា ឆ្នាំ២០២១ នៅទីស្តីការក្រសួង ក្នុងឱកាសផ្តល់បាឋកថាតាមប្រព័ន្ធវីដេអូពីចម្ងាយ (Zoom) តាមការអញ្ជើញរបស់សាលាភូមិន្ទរដ្ឋបាលលើប្រធានបទស្តីពី «ភាពជាអ្នកដឹកនាំ និងនវានុវត្តន៍» ជូនដល់សិក្ខាកាមជាន់ខ្ពស់នៃវគ្គបណ្តុះបណ្តាលភាពជាអ្នកដឹកនាំ និងនវានុវត្តន៍ ដែលបានរៀបចំឡើងក្រោមកិច្ចសហប្រតិបត្តិការរវាងក្រសួងមុខងារសាធារណៈ តាមរយៈសាលាភូមិន្ទរដ្ឋបាល និងធនាគារពិភពលោក សរុបប្រមាណ ១៥០រូប មកពី២៧ស្ថាប័នដែលជាថ្នាក់ដឹកនាំក្រសួង-ស្ថាប័ន និងអង្គភាពថ្នាក់ក្រោមជាតិ។

    ទាក់ទងនិងបទពិសោធន៍ការកែទម្រង់របៀបធ្វើការងារនៅក្នុងស្ថាប័នរដ្ឋ ក៏ដូចជាវិស័យឯកជន លោក ស៊ុន ចាន់ថុល បានសង្កាត់ធ្ងន់ថា អ្នកដឹកនាំមានរយៈពេល យ៉ាងយូរ៦ខែប៉ុណ្ណោះ ដើម្បីធ្វើការកែទម្រង់របៀបធ្វើការឱ្យបានជោគជ័យ ដោយហេតុថា អ្នកខ្លះមិនចង់កែទម្រង់របៀបធ្វើការ អ្នកខ្លះខ្លាចការ កែទម្រង់របៀបធ្វើការ និងអ្នកខ្លះទៀតចង់អោបក្រសោបរបៀបធ្វើការ ចាស់ ដូច្នេះការកែទម្រង់របៀបធ្វើការមិនមែនជាការងារងាយស្រួលនោះឡើយ។

    លោកទេសរដ្ឋមន្ត្រី ក៏បានផ្តាំផ្ញើដល់អង្គសិក្ខាកាមទាំងអស់ថា ក្នុងនាមជាថ្នាក់ដឹកនាំ ត្រូវចេះលើកទឹកចិត្តដល់មន្ត្រីក្រោមឱវាទ មានការទទួលខុសត្រូវខ្ពស់ចំពោះការងារ ប៉ុន្តែថ្នាក់ដឹកនាំគួរតែទទួលយកខុសបានហើយ ទុកឱ្យមន្ត្រីក្រោមឱវាទជាអ្នកទទួលយកត្រូវ ដូចនឹងអនុសាសន៍ដ៏ខ្ពង់ខ្ពស់របស់សម្តេចតេជោ ហ៊ុន សែន ដែលថា មន្ត្រីគឺជាអ្នកបម្រើរាស្ត្រ មិនមែនជាចៅហ្វាយ របស់រាស្ត្រទេ ត្រូវខិតខំប្រឹងប្រែងផ្តល់សេវាសាធារណៈឱ្យបានលឿន មានប្រសិទ្ធភាព និងតម្លាភាព។

    លោកទេសរដ្ឋមន្ត្រី បានធ្វើកត់សម្គាល់បន្ថែមថា៖ ក្នុងសង្គមយើងសព្វថ្ងៃនេះមានមនុស្សចំនួនបួនប្រភេទគឺ៖ អ្នកថា អ្នកធ្វើ អ្នកឈរមើល និងអ្នកទិតៀន ក្នុងចំណោមមនុស្សបួនប្រភេទនេះ ចូរកុំធ្វើខ្លួនជាអ្នកថា និងអ្នកឈរមើល គួរចូលរួមជាមួយរាជរដ្ឋាភិបាល ដើម្បីអភិវឌ្ឍប្រទេសជាតិយើងឱ្យមានការរីកចម្រើន។

    លោកទេសរដ្ឋមន្ត្រី បានថ្លែងអំណរគុណដល់សាលាភូមិន្ទរដ្ឋបាល ដែលបានយកចិត្តទុកដាក់ក្នុងការបណ្តុះបណ្តាលធនធានមនុស្ស ដើម្បីឆ្លើយតបនឹងការ អភិវឌ្ឍរបស់ ប្រទេសជាតិ និងដៃគូអភិវឌ្ឍន៍ដែលបានចូលរួមសហការក្នុងការបណ្តុះបណ្តាលមន្ត្រីកម្ពុជាពីគ្រប់ក្រសួង-ស្ថាប័នឱ្យមាន សមត្ថភាពខ្ពស់ដើម្បី បំពេញការងារ ប្រកបដោយប្រសិទ្ធភាព។

    លោកទេសរដ្ឋមន្ត្រី ក៏បានលើកឡើងនូវពាក្យស្លោកអប់រំថា «យើងមិនអាចរស់នៅលើកោះ ដែលសម្បូរទៅដោយទ្រព្យសម្បត្តិស្តុកស្តម្ភ ហើយហ៊ុព័ទ្ធដោយសមុទ្រ នៃភាពក្រីក្រនោះទេ»។ វាគឺជាការទទួលខុសត្រូវរបស់អ្នករាល់គ្នា ដែលត្រូវធ្វើការជាមួយគ្នា ដើម្បីពង្រីកកោះដែលពោរ ពេញដោយទ្រព្យសម្បត្តិ ឱ្យកាន់តែធំទៅៗ និងធ្វើឱ្យសមុទ្រនៃភាពក្រីក្រនេះកាន់តែរួមតូចទៅៗ ដើម្បីជាប្រយោជន៍ដល់ប្រជាជន និងមនុស្សជាតិ និងពាក្យស្លោកមួយចំនួនទៀតដូចជា បើអ្នកមិនដឹងថា អ្នកទៅណា ផ្លូវណាក៏នាំអ្នកទៅដល់ទីនោះដែរ និយាយត្រូវធ្វើ កុំនិយាយផ្សេងធ្វើផ្សឹង សំដីឥតប្រយោជន៍នាំគ្រោះដល់ជាតិ ការងារមានប្រសិទ្ធភាពនាំជាតិរុងរឿង និងកុំសួរថាកម្ពុជាធ្វើអីឱ្យយើង ត្រូវសួរថាយើងធ្វើអីឱ្យកម្ពុជា៕

    ហាមដាច់ខាតការយកអត្ថបទពីវេបសេយ www.baykdang.com ដោយគ្មានការអនុញ្ញាតិ។ បើលោកអ្នក ត្រូវការអត្ថបទ សូម inbox ទៅហ្វេសប៊ុកផេច [email protected]

    ព័ត៌មានទាក់ទង៖

  • ព័ត៌មានថ្មីៗ