ក្រុមហ៊ុនផ្គត់ផ្គង់សេវាអ៊ីនធើណិត Starlink បានបញ្ចេញឲ្យដឹងនូវ តួលេខសរុបពិតប្រាកពីចំនួនអ្នកទិញកញ្ចប់សេវាកម្ម កើនឡើងដល់ ១០ ម៉ឺននាក់ហើយ។
ក្នុងរយៈពេលត្រឹមមួយខែសោះ Starlink រកបានអតិថិជនថ្មីមកចុះឈ្មោះទិញសេវាថែម ១ ម៉ឺននាក់ទៀតដែលជាចំនួនហក់ឡើងខ្ពស់គួរឲ្យកត់សម្គាល់ អាចមកពីឥទ្ធិពល Elon Musk ដែលជា CEO និងតម្លៃសមរម្យនៃកញ្ចប់សេវានោះផងដែរ ខណៈដែលកាលពីខែកក្កដាឆ្នាំ ២០២១ មានអតិថិជន ៩ ម៉ឺននាក់ប៉ុណ្ណោះ ។
បើយោងតាមការបង្ហោះសារលើ Twitter បានឲ្យដឹងថា ពេលនេះមានប្រទេសចំនួន ១៤ ដែលត្រៀមនឹងប្រើប្រាស់សេវាកម្មរបស់ Starlink រួមទាំងប្រទេសផ្សេងៗដែលកំពុងដំណើរការស្នើសុំកម្មសិទ្ធបញ្ញា។
រំឮកផងដែរថា ដែនដីជាយដែនសហរដ្ឋអាមេរិក និងប្រទេសកាណាដា បានប្រើប្រាស់មុនគេនូវជំនាន់ Beta របស់ Starlink ដែលជា សេវាអ៊ីនធើណិតភ្ជាប់ផ្ទាល់ពីផ្កាយរណបមានល្បឿនលឿន៕
