• និយតករឱសថអឺរ៉ុប កំពុងសិក្សាលើផលប៉ះពាល់នៃវ៉ាក់សាំងប្រភេទ mRNA របស់ក្រុមហ៊ុន Pfizer និង Moderna

    (អឺរ៉ុប)៖ និយតករឱសថអឺរ៉ុប (EMA) បាននិយាយនៅថ្ងៃពុធ ទី១១ ខែសីហានេះថា ខ្លួនបានចាប់ផ្តើមពិនិត្យមើលលក្ខខណ្ឌថ្មីចំនួន ៣ ដើម្បីវាយតម្លៃថាតើ លក្ខខណ្ឌទាំងនោះអាចមានផលប៉ះពាល់ ដែលមានទាក់ទងនឹងវ៉ាក់សាំងកូវីដ១៩ ប្រភេទmRNA របស់ក្រុមហ៊ុន Pfizer-BioNTech និង Moderna ដែរទេ បន្ទាប់ពីមានករណីមួយចំនួនបានកើតឡើង។ នេះបើយោងតាមការចេញផ្សាយ សារព័ត៌មាន Reuters នៅយប់ថ្ងៃពុធ ទី១១ ខែសីហា ឆ្នាំ២០២១។

    និយតករឱសថអឺរ៉ុប (EMA) បានគូសបញ្ជាក់ថា គណៈកម្មាធិការសុវត្ថិភាពរបស់ខ្លួន កំពុងសិក្សាលើរោគសញ្ញា Erythema multiforme ដែលជាទម្រង់មួយនៃជំងឺប្រតិកម្មអាឡែស៊ីស្បែក, បញ្ហាប្រព័ន្ធប្រសាទ និងបញ្ហាទាក់ទងនឹងតម្រងនោម។

    បច្ចេកវិទ្យា mRNA ដែលត្រូវបានប្រើដោយក្រុមហ៊ុនធំៗចំនួនពីរ គឺក្រុមហ៊ុន Pfizer និងក្រុមហ៊ុន Moderna សម្រាប់ការផលិតវ៉ាក់សាំងប្រឆាំងនឹងជំងឺកូវីដ១៩ ដែលត្រូវបានគេមើលឃើញថា ជាចំណុចរបត់មួយនៃសហគមន៍វិទ្យាសាស្ត្រ ប៉ុន្តែផលប៉ះពាល់ដ៏កម្រមួយចំនួន នៃវ៉ាក់សាំងទាំងនេះកំពុងត្រូវបានសិក្សា ខណៈមនុស្សកាន់តែច្រើនឡើងៗទទួលចាក់នៅទូទាំងពិភពលោក។

    កាលពីខែមុន EMA បានរកឃើញទំនាក់ទំនងរវាងបញ្ហារលាកបេះដូងដ៏កម្រ និងការចាក់វ៉ាក់សាំង mRNA ។ ទោះយ៉ាងណាក៏ដោយ ទាំងនិយតករអឺរ៉ុប និងអង្គការសុខភាពពិភពលោកបានសង្កត់ធ្ងន់ថា អត្ថប្រយោជន៍នៃវ៉ាក់សាំងទាំងនេះមានលើសពីហានិភ័យរបស់វា។

    ជុំវិញបញ្ហានេះទាំងក្រុមហ៊ុន Pfizer-BioNTech និង Moderna មិនបានឆ្លើយតបភ្លាមៗចំពោះសំណើសុំការអត្ថាធិប្បាយរបស់ទីភ្នាក់ងារ Reuters ទេ៕

    ហាមដាច់ខាតការយកអត្ថបទពីវេបសេយ www.baykdang.com ដោយគ្មានការអនុញ្ញាតិ។ បើលោកអ្នក ត្រូវការអត្ថបទ សូម inbox ទៅហ្វេសប៊ុកផេច [email protected]

    ព័ត៌មានទាក់ទង៖

  • ព័ត៌មានថ្មីៗ