• Inter ចូលរួមជាមួយ Arsenal ដកខ្លួនចេញ ពីការប្រកួតនៅសហរដ្ឋអាមេរិក ដោយបារម្ភ COVID-19

    (អ៉ីតាលី)៖ ក្លិបបាល់ទាត់ Inter Milan បានអនុវត្តតាមក្លិប Arsenal ដោយលុបចោលការធ្វើដំណើរ ទៅកាន់សហរដ្ឋអាមេរិក ដើម្បីទៅចូលរួមការប្រកួតមុនរដូវកាលរបស់ពួកគេ ក្នុងព្រឹត្តិការណ៍ Florida Cup ដោយសារបារម្ភបញ្ហា COVID-19, នេះបើតាមការបញ្ជាក់ពី ក្លិបម្ចាស់ពានរង្វាន់ជើងឯក លីគ Serie A របស់អ៉ីតាលីនេះ ហើយត្រូវបានចុះផ្សាយដោយសារព័ត៌មាន CNA នាយប់ថ្ងៃទី២២ ខែកក្កដា ឆ្នាំ២០២១នេះ។

    សូមរំលឹកថា ក្លិប Arsenal បានសម្រេចចិត្តនៅថ្ងៃអង្គារ ដោយលុបចោលការធ្វើដំណើរ ទៅកាន់សហរដ្ឋអាមេរិក ដើម្បីចូលរួមប្រកួតក្នុងព្រឹត្តិការណ៍នេះ ដោយសារ «រកឃើញសមាជិកមួយចំនួនតូច មានករណីវិជ្ជមាន ជំងឺ COVID-19» នៅឯក្លិបដែលមានទីតាំង ស្ថិតនៅភាគខាងជើងទីក្រុងឡុងដ៍នេះ។

    Inter គ្រោងនឹងប្រកួតតទល់នឹង Arsenal នាថ្ងៃអាទិត្យ, ជាមួយនឹងក្រុមឈ្នះ នឹងត្រូវជួបជាមួយក្រុមឈ្នះ ក្នុងការប្រកួតរវាងក្រុម Everton តទល់នឹងក្រុម Millonarios នៅថ្ងៃទី២៨ ខែកក្កដាខាងមុខ។

    «FC Internazionale Milano បានប្រកាសថា ពួកគេនឹងមិនធ្វើដំណើរទៅកាន់សហរដ្ឋអាមេរិក ដើម្បីចូលរួមក្នុងព្រឹត្តិការណ៍ Florida Cup នោះទេ ដោយសារតែហានិភ័យ នាពេលថ្មីៗនេះ ពាក់ព័ន្ធនឹងការធ្វើដំណើរអន្តរជាតិ ដែលបណ្តាលមកពីការរីករាលដាល នៃជំងឺ COVID-19, ហានិភ័យទាំងនេះហើយ ដែលធ្វើឲ្យក្លិប Arsenal FC បានដកខ្លួន រួចរាល់ហើយ ចេញពីការចូលរួមព្រឹត្តិការណ៍នេះ», នេះបើតាមក្លិប Inter បានឲ្យដឹងនៅក្នុងសេចក្តីថ្លែងការណ៍។

    សូមបញ្ជាក់ថា Inter, ដែលស្ថិតក្រោមការដឹកនាំ របស់គ្រូបង្វឹកថ្មី លោក Simone Inzaghi នោះ, នឹងចាប់ផ្តើមយុទ្ធនាការ ការពារពានរង្វាន់របស់ពួកគេ ដោយនឹងធ្វើជាម្ចាស់ផ្ទះ ស្វាគមន៍ក្លិប Genoa នៅថ្ងៃទី២១ ខែសីហាខាងមុខ៕

    ហាមដាច់ខាតការយកអត្ថបទពីវេបសេយ www.baykdang.com ដោយគ្មានការអនុញ្ញាតិ។ បើលោកអ្នក ត្រូវការអត្ថបទ សូម inbox ទៅហ្វេសប៊ុកផេច [email protected]

    ព័ត៌មានទាក់ទង៖

  • ព័ត៌មានថ្មីៗ