• កងកម្លាំងសន្តិសុខមីយ៉ាន់ម៉ា វាយប្រហារក្រុមប្រដាប់់អាវុធនៅតំបន់ Sagaing, មនុស្ស២៥នាក់ស្លាប់

    (រ៉ង់ហ្គូន)៖ មនុស្សយ៉ាងតិច ២៥នាក់ត្រូវបានសម្លាប់ ដោយកងកម្លាំងសន្តិសុខមីយ៉ាន់ម៉ា កាលពីចុងសប្ដាហ៍មុន នៅក្នុងការប្រឈមមុខដាក់គ្នា ជាមួយក្រុមប្រដាប់អាវុធប្រឆាំងនឹងរដ្ឋាភិបាលរបស់យោធាមីយ៉ាន់ម៉ា នៅទីក្រុងមួយដែលស្ថិតនៅភាគកណ្តាល នៃប្រទេសអាស៊ីអាគ្នេយ៍មួយនេះ។ នេះបើតាមការចេញផ្សាយ ដោយសារព័ត៌មាន Reuters នៅព្រឹកថ្ងៃចន្ទ ទី០៥ ខែកក្កដា ឆ្នាំ២០២១។

    អ្នកនាំពាក្យយោធា មិនបានឆ្លើយតបទៅនឹងការហៅទូរស័ព្ទ ដើម្បីស្នើសុំការអត្ថាធិប្បាយអំពីអំពើហិង្សានៅទីក្រុង ដេផាយីន (Depayin) ក្នុងតំបន់ សាហ្គេង (Sagaing) ដែលមានចម្ងាយប្រហែល ៣០០គីឡូម៉ែត្រពីភាគខាងជើងរដ្ឋធានីណៃពិដោ (Naypyidaw) នោះទេ។

    ប្រព័ន្ធផ្សព្វផ្សាយមីយ៉ាន់ម៉ា គ្លោបល ញូ ឡែត៍ (Global News Light of Myanmar) បានគូសបញ្ជាក់ថា ក្រុមប្រដាប់អាវុធបានស្ទាក់វាយប្រហារកងកម្លាំងសន្តិសុខ ដែលបានដើរល្បាតនៅទីនោះ ដោយបានសម្លាប់សមាជិករបស់ពួកគេម្នាក់ និងបានធ្វើឲ្យសមាជិករបស់ពួកគេ ០៦នាក់ទៀតរងរបួស។ ក្រុមប្រដាប់អាវុធបានដកថយវិញ បន្ទាប់ពីការវាយបកដោយកងកម្លាំងសន្តិសុខ។ សាកសពមនុស្សសរុប ២៥នាក់ត្រូវបានរកឃើញ បន្ទាប់ពីការប្រយុទ្ធបង្ហូរឈាមគ្នាដ៏សាហាវឃោឃៅនេះ។

    គួរបញ្ជាក់ថា ប្រទេសមីយ៉ាន់ម៉ាបានធ្លាក់ចូលក្នុងភាពច្របូកច្របល់ ចាប់តាំងពីយោធាបានធ្វើរដ្ឋប្រហារ ទម្លាក់រដ្ឋាភិបាលលោកស្រី អោង សាន ស៊ូ ជី កាលពីថ្ងៃទី០១ ខែកុម្ភៈកន្លងទៅនេះ ដែលបានបង្កឱ្យមានការតវ៉ា និងអំពើហិង្សាជាបន្តបន្ទាប់ ទាំងរវាងក្រុមអ្នកគាំទ្ររដ្ឋាភិបាលលោកស្រី ស៊ូ ជី និងក្រុមប្រដាប់អាវុធជនជាតិភាគតិច៕

    ហាមដាច់ខាតការយកអត្ថបទពីវេបសេយ www.baykdang.com ដោយគ្មានការអនុញ្ញាតិ។ បើលោកអ្នក ត្រូវការអត្ថបទ សូម inbox ទៅហ្វេសប៊ុកផេច [email protected]

    ព័ត៌មានទាក់ទង៖

  • ព័ត៌មានថ្មីៗ