• បង់ក្លាដែស «ខកចិត្ត» ចំពោះប្រទេសអ្នកមានខ្លះ ដែលស្តុកទុកវ៉ាក់សាំងលើសពីតម្រូវការ

    (បាងកក)៖ រដ្ឋមន្ត្រីការបរទេសបង់ក្លាដែស លោក អាប់ឌុល ម៉ូមិន (Abdul Momen) បានបង្ហាញការខកចិត្តជាខ្លាំង ចំពោះបណ្ដាប្រទេសអ្នកមានមួយចំនួន ដែលស្ដុកទុកវ៉ាក់សាំង COVID-19 លើសពីតម្រូវការ និងកំពុងដាក់លក្ខខណ្ឌសម្រាប់ការផ្គត់ផ្គង់ ដល់បណ្ដាប្រទេសដទៃថែមទៀត។ នេះបើតាមការចេញផ្សាយ ដោយសារព័ត៌មាន The Nation នៅព្រឹកថ្ងៃពុធ ទី២៣ ខែមិថុនា ឆ្នាំ២០២១។

    ថ្លែងទៅកាន់អ្នកសារព័ត៌មាននៅថ្ងៃពុធនេះ លោក Abdul Momen បានគូសបញ្ជាក់យ៉ាងដូច្នេះថា «នាយករដ្ឋមន្ត្រីរបស់យើងបាននិយាយថា វ៉ាក់សាំង COVID-19 គួរតែជាទំនិញសាធារណៈមួយ។ ប៉ុន្តែជាអកុសល បណ្ដាប្រទេសអ្នកមានខ្លះ បែរជានាំគ្នាស្ដុកទុកវ៉ាក់សាំងលើសពីតម្រូវការទៅវិញ ខណៈវ៉ាក់សាំងទាំងនោះ កំពុងជិតផុតសុពលភាពទៅទៀត»។

    លោក Abdul Momen បានបន្ថែមថា បណ្ដាប្រទេសធំៗមួយចំនួនបានសន្យាផ្ដល់វ៉ាក់សាំង ប៉ុន្តែពួកគេមិនទាន់បំពេញតាមសន្យានៅឡើយទេ ហើយពេលខ្លះពួកគេថែមទាំងដាក់លក្ខខណ្ឌទៀតផង ប្រសិនបើប្រទេសណាមួយ ចង់បានវ៉ាក់សាំងទាំងនោះ។

    គួរបញ្ជាក់ថា នៅក្នុងកិច្ចប្រជុំកាលពីសប្ដាហ៍មុន ក្រុមមេដឹកនាំប្រទេស G7 បានសន្យាថា នឹងចែកចាយវ៉ាក់សាំង ១ពាន់លានដូសដល់បណ្ដាប្រទេសនានា
    ជុំវិញពិតភពលោក នៅត្រឹមឆ្នាំ២០២២ខាងមុខនេះ។ ប៉ុន្តែបើតាមលោក Abdul Momen ប្រទេសអ្នកមានទាំងនេះបានធ្វើការសន្យាមែន តែមិនទាន់ផ្ដល់វ៉ាក់សាំងនៅឡើយទេ៕

    ហាមដាច់ខាតការយកអត្ថបទពីវេបសេយ www.baykdang.com ដោយគ្មានការអនុញ្ញាតិ។ បើលោកអ្នក ត្រូវការអត្ថបទ សូម inbox ទៅហ្វេសប៊ុកផេច [email protected]

    ព័ត៌មានទាក់ទង៖

  • ព័ត៌មានថ្មីៗ