• ក្រុមហ៊ុនមួយនៅទីក្រុងវូហាន ដែលជាបុត្រសម្ព័ន្ធរបស់ Sinopharm នឹងជំរុញការផលិតវ៉ាក់សាំង ១ពាន់លានដូសក្នុង១ឆ្នាំ

    (ប៉េកាំង)៖ ក្រុមហ៊ុនសម្ព័ន្ធមួយនៃក្រុមហ៊ុនចិន Sinopharm ដែលមានមូលដ្ឋានក្នុងទីក្រុងវូហានបានឱ្យដឹងថា ការចាប់ផ្ដើមប្រតិបត្តិការនៅឯរោងចក្រថ្មីមួយរបស់ខ្លួន នឹងជួយបង្កើនសមត្ថភាពផលិតវ៉ាក់សាំង COVID-19 ប្រចាំឆ្នាំយ៉ាងហោច ១ពាន់លានដូស។ នេះបើតាមការចេញផ្សាយ ដោយទីភ្នាក់ងារព័ត៌មាន Reuters នៅព្រឹកថ្ងៃអង្គារ ទី០១ ខែមិថុនា ឆ្នាំ២០២១។

    វិទ្យាសាស្ត្រអភិវឌ្ឍផលិតផលជីវសាស្ត្រ វូហាន (Wuhan Institute of Biological Products) បានធ្វើការកត់សម្គាល់ដូចខាងលើ នៅក្នុងសេចក្ដីថ្លែងការណ៍មួយ ចេញផ្សាយនៅថ្ងៃចន្ទសប្ដាហ៍នេះ ប៉ុន្តែក្រុមហ៊ុននេះមិនបានបញ្ជាក់ថា តើពេលណាទើបរោងចក្រថ្មីខាងលើ នឹងចាប់ផ្ដើមផលិតវ៉ាក់សាំងពេញសមត្ថភាពនោះទេ។ ទោះជាយ៉ាងណា ការប្រកាសបែបនេះគឺស្របតាមគោលដៅរបស់ក្រុមហ៊ុន Sinopharm ដែលចង់ផលិតវ៉ាក់សាំង COVID-19 របស់ខ្លួនឱ្យបាន ៣ពាន់លានដូសក្នុងមួយឆ្នាំ។

    គួរបញ្ជាក់ថា Wuhan Institute of Biological Products ជាក្រុមហ៊ុនបុត្រសម្ព័ន្ធរបស់ក្រុមហ៊ុនចិន Sinopharm មានរោងចក្រមួយដែលមានសមត្ថភាពផលិតវ៉ាក់សាំង ១ពាន់លានដូសក្នុងមួយឆ្នាំ និងបច្ចុប្បន្នកំពុងសាងសង់រោចចក្រថ្មីមួយទៀត។ ប្រទេសចិនមកទល់នឹងពេលនេះ បានអនុម័តឱ្យប្រើប្រាស់ជាទូទៅនូវវ៉ាក់សាំង COVID-19 ចំនួន ០៤ របស់ក្រុមហ៊ុនក្នុងស្រុកដូចជា Sinopharm, Sinovac Biotech និងក្រុមហ៊ុន CanSino Biologics ហើយវ៉ាក់សាំងចំនួន ០៣ផ្សេងទៀតត្រូវបាន អនុញ្ញាតសម្រាប់ការប្រើប្រាស់បន្ទាន់។

    ក្រុមហ៊ុនចិន Sinovac Biotech ដែលមានសមត្ថភាពផលិតវ៉ាក់សាំង ២ពាន់លានដូសក្នុងមួយឆ្នាំ នៅថ្ងៃអង្គារនេះក៏បានឱ្យដឹងដែរថា ខ្លួនបានផ្គង់ផ្គង់វ៉ាក់សាំង ៦០០លានដូសទាំងនៅក្នុងស្រុក និងនៅក្រៅស្រុក គិតត្រឹមដំណាច់ខែឧសភា ឆ្នាំ២០២១៕

    ហាមដាច់ខាតការយកអត្ថបទពីវេបសេយ www.baykdang.com ដោយគ្មានការអនុញ្ញាតិ។ បើលោកអ្នក ត្រូវការអត្ថបទ សូម inbox ទៅហ្វេសប៊ុកផេច [email protected]

    ព័ត៌មានទាក់ទង៖

  • ព័ត៌មានថ្មីៗ