• ហូជីមិញ បិទខ្ទប់តំបន់ខ្លះរយៈពេល២សប្តាហ៍ ក្រោយកូវីដ១៩ វាយលុកខ្លាំង

    (ហាណូយ)៖ អាជ្ញាធរក្រុងហូជីមិញនឹងអនុវត្តវិធានការបិទខ្ទប់តំបន់មួយចំនួន និងវិធានការរក្សាគម្លាតសុវត្ថិភាពនៅតាមតំបន់ផ្សេងទៀតក្នុងទីក្រុង រយៈពេល ២សប្តាហ៍ ដោយចាប់ផ្តើមពីម៉ោង០០ ថ្ងៃចន្ទ ទី៣១ ខែឧសភានេះក្រោមសារាចរណ៍ណែនាំរបស់រដ្ឋាភិបាល។ នេះបើយោងតាមការចេញផ្សាយដោយ សារព័ត៌មានវៀតណាមនៅយប់ថ្ងៃអាទិត្យ ទី៣០ ខែឧសភា ឆ្នាំ២០២១។

    សេវាកម្មមិនចាំបាច់នានា ក៏ដូចជាសកម្មភាពកំសាន្ត និងកីឡាផ្សេងៗនៅតាមទីសាធារណៈនឹងត្រូវហាមឃាត់។ ការប្រមូលផ្តុំនៅតាមទីសាធារណៈ ដែលមានមនុស្សលើសពីប្រាំនាក់ នឹងត្រូវហាមឃាត់។ ចំណែកឯព្រឹត្តិការណ៍នានា និងការប្រជុំគ្នាក្នុងបន្ទប់តែមួយដែលមានមនុស្សជាង២០ ក៏មិនត្រូវបានអនុញ្ញាតដែរ។

    ប្រជាជនត្រូវរក្សាគម្លាតពីគ្នាចម្ងាយ ២ម៉ែតនៅទីសាធារណៈ ហើយការធ្វើដំណើរពីតំបន់ដែលរងការវាយប្រហារដោយសារកូវីដ១៩ធ្ងន់ធ្ងរ ក៏នឹងត្រូវបានកំណត់ផងដែរ។

    ទន្ទឹមនឹងនេះ សារាចរលេខ១៦ របស់រដ្ឋាភិបាលវៀតណាម ដែលសំដៅអនុវត្តចំពោះតំបន់ Gấp និង ThạnhLộc សង្កាត់ទី១២ ជាពិសេសនោះ គឺតម្រូវឲ្យប្រជាជនស្នាក់នៅតែក្នុងផ្ទុះ លើកលែងតែករណីចំបាច់បំផុតប៉ុណ្ណោះ។

    គួរបញ្ជាក់ថា ចង្កោមចម្លងនៅទីក្រុងហូជីមិញ ដែលពាក់ព័ន្ធនឹងព្រះវិហារគ្រឹស្តសាសនា នៅតែបន្តកើនឡើងជាលំដាប់ ដោយមានអ្នកឆ្លងថ្មីចំនួន ៥៩នាក់បានបញ្ជាក់ក្នុងចំណោម ២៥០ករណីនៅថ្ងៃអាទិត្យនេះ ដែលធ្វើឲ្យទីក្រុងភាគខាងត្បូងមួយនេះក្លាយជាកន្លែងផ្ទុះឆ្លងជំងឺកូវីដ១៩ ធ្ងន់ធ្ងរជាងគេទី២ បន្ទាប់ពីខេត្ត Bắc Giang ដែលស្ថិតភាគខាងជើងប្រទេសនាពេលបច្ចុប្បន្ន។

    រហូតមកទល់ពេលនេះវៀតណាមមានករណីឆ្លង ៧,១០៧ករណី ក្នុងនោះស្លាប់៤៧នាក់ និងជាសះស្បើយ ២,៩៥០នាក់៕

    ហាមដាច់ខាតការយកអត្ថបទពីវេបសេយ www.baykdang.com ដោយគ្មានការអនុញ្ញាតិ។ បើលោកអ្នក ត្រូវការអត្ថបទ សូម inbox ទៅហ្វេសប៊ុកផេច [email protected]

    ព័ត៌មានទាក់ទង៖

  • ព័ត៌មានថ្មីៗ