• FFC បង្ហាញកីឡាករជម្រើសជាតិ ២៤នាក់ត្រៀមប្រកួតជម្រុះ World Cup នៅបារ៉ែន ខណៈកូនកាត់ខ្មែរ-ហ្គាណា ឡេង ណូរ៉ា ក្មេងជាងគេ

    (ភ្នំពេញ)៖ សហព័ន្ធកីឡាបាល់ទាត់កម្ពុជា (FFC) បានបង្ហាញបញ្ជីឈ្មោះកីឡាករក្រុមជម្រើសជាតិកម្ពុជា ដែលត្រូវចេញទៅប្រកួតជម្រុះពានរង្វាន់បាល់ទាត់ពិភពលោក FIFA World Cup Qatar 2022 នៅប្រទេសបារ៉ែននាដើមខែមិថុនាខាងមុខហើយ គឺមានកីឡាករចំនួន ២៤នាក់ក្នុងនោះក៏មានវត្តមានកីឡាករកូនកាត់ខ្មែរ-ហ្គាណា ឡេង ណូរ៉ា ដែលមានវ័យទើប ១៧ឆ្នាំផងដែរ។

    បញ្ជីឈ្មោះក្រុមគោព្រៃកម្ពុជាដែលដឹកនាំដោយគ្រូបង្វឹកថ្មីសញ្ជាតិជប៉ុន លោក Ryu Hirose រួមមានកីឡាករវិសាខា ៦រូប, ក្លិបបឹងកេត ៥រូប, ខណៈក្លិបណាហ្គាវើលដ៏ ព្រះខ័នរាជស្វាយរៀង និងក្លិបភ្នំពេញក្រោន មានសមាជិក ៣រូបៗដូចគ្នា។ ចំណែក ៤នាក់ទៀត សុទ្ធតែជាកីឡាករវ័យក្មេងរបស់ខេត្តព្រៃវែង រួមមាន វុធ តុលា, ញឹម លីហួរ, ស រតនា និងកីឡាករវ័យក្មេងជាងគេ ឡេង ណូរ៉ា។

    តាមគម្រោងក្រុមជម្រើសជាតិកម្ពុជា នឹងចាកចេញទៅប្រទេសបារ៉ែននៅយប់ថ្ងៃទី២៧ ខែឧសភាខាងមុខ ដើម្បីប្រមូលផ្ដុំហ្វឹកហាត់ និងត្រៀមការប្រកួតសេសសល់ ៣ប្រកួតចុងក្រោយនៃវគ្គជម្រុះពានរង្វាន់ FIFA World Cup Qatar 2022 ពូល C នៅទីនោះតែម្ដង។

    សម្រាប់កម្មវិធីប្រកួត ៣ប្រកួតចុងក្រោយរបស់ក្រុមគោព្រៃកម្ពុជា រួមមាននៅថ្ងៃទី០៣ ខែមិថុនា កម្ពុជាត្រូវប្រកួតជាមួយក្រុមម្ចាស់ផ្ទះបារ៉ែន នាវេលាម៉ោង ១១៖៣០នាទីយប់ (ម៉ោងនៅកម្ពុជា), ថ្ងៃទី០៧ ខែមិថុនា កម្ពុជាប្រកួតជាមួយអ៊ីរ៉ាក់ នាម៉ោង ៩៖៣០នាទីយប់ (ម៉ោងនៅកម្ពុជា) និងថ្ងៃទី១១ ខែមិថុនា កម្ពុជាប្រកួតជាមួយអ៊ីរ៉ង់នៅម៉ោង ៩៖៣០នាទីយប់ (ម៉ោងនៅកម្ពុជា)។

    ចំពោះលទ្ធផលបណ្ដោះអាសន្នក្នុងពូល C ក្រុមជម្រើសជាតិអ៊ីរ៉ាក់ កំពុងឈរកំពូលតារាង ដោយមាន ១១ពិន្ទុក្នុងដៃ គ្រាដែលបារ៉ែន ឈរលេខ២ និងមាន ៩ពិន្ទុ ហើយក្រុមខ្លាំងអ៊ីរ៉ង់ ដែលនៅសល់ ៤ប្រកួតក្នុងដៃ កំពុងឈរលេខ៣ និងមាន ៦ពិន្ទុ។ ចំណែកកម្ពុជា ឈរបាតតារាង និងមាន ១ពិន្ទុប៉ុណ្ណោះ បន្ទាប់ពីឆ្លយកាត់ ៥ប្រកួត ស្មើ១ និងចាញ់៤ កាលពីឆ្នាំ២០១៩ កន្លងទៅ៕

    ហាមដាច់ខាតការយកអត្ថបទពីវេបសេយ www.baykdang.com ដោយគ្មានការអនុញ្ញាតិ។ បើលោកអ្នក ត្រូវការអត្ថបទ សូម inbox ទៅហ្វេសប៊ុកផេច [email protected]

    ព័ត៌មានទាក់ទង៖

  • ព័ត៌មានថ្មីៗ