• រដ្ឋបាលខេត្តព្រះសីហនុ សម្រេចដាក់ក្រុងព្រះសីហនុ និងស្រុកព្រៃនប់ ជា «តំបន់លឿង» រយៈពេលពីរសប្តាហ៍

    (ព្រះសីហនុ)៖ អភិបាលខេត្តព្រះសីហនុ លោក គួច ចំរើន នៅថ្ងៃទី២៣ ខែឧសភា ឆ្នាំ២០២១នេះ បានសម្រេចដាក់ក្រុងព្រះសីហនុ និងស្រុកព្រៃនប់ ជា «តំបន់លឿង» ជាមួយការហាមធ្វើដំណើរពេលយប់ចាប់ពីម៉ោង ៨យប់ ដល់ម៉ោង ៥ភ្លឺ លើកលែងតែការធ្វើដំណើរចាំបាច់មួយចំនួន។

    ក្នុងសេចក្តីសម្រេចនៅថ្ងៃទី២៣ ខែឧសភា ឆ្នាំ២០២១នេះ បានគូសបញ្ជាក់ថា ការកំណត់ក្រុងព្រះសីហនុ និងស្រុកព្រៃនប់ ជា «តំបន់លឿង» មានរយៈពេលពីរសប្តាហ៍ គិតចាប់ពីម៉ោងសូន្យថ្ងៃទី២៤ ខែឧសភា ដល់ថ្ងៃទី០៦ ខែមិថុនា ឆ្នាំ២០២១។

    ជាមួយការកំណត់ក្រុងព្រះសីហនុ និងស្រុកព្រៃនប់ ជា «តំបន់លឿង» នេះ សកម្មភាពមួយចំនួនត្រូវបានរឹតត្បិត។ បើតាមសេចក្តីសម្រេចនេះ ការជួបជុំ ឬការប្រមូលផ្តុំជាលក្ខណៈឯកជន ត្រូវបានហាមឃាត់ លើកលែងតែការជួបជុំក្នុងចំណោមសមាជិកគ្រួសារ ដែលរស់នៅក្នុងលំនៅឋាន ឬទីសំណាក់ជាមួយគ្នា។

    ការជួបជុំ ឬការប្រមូលផ្តុំមនុស្ស ដើម្បីសេពគ្រឿងស្រវឹងគ្រប់ប្រភេទ ត្រូវបានហាមឃាត់, ផ្ទាកការធ្វើដំណើរពេលយប់ចាប់ពីម៉ោង ៨យប់ ដល់ម៉ោង ៥ភ្លឺ លើកលែងករណីចាំបាច់មួយចំនួន។

    ក្នុងសេចក្តីសម្រេចនេះ ក៏បានគូសបញ្ជាក់ផងដែរថា ក្នុងករណីរកឃើញជំងឺកូវីដ១៩ នៅក្នុងលំនៅឋាន ទីសំណាក់ សណ្ឋាគារ កាស៊ីណូ ផ្ទះសំណាក់ ក្រុមហ៊ុន រោងចក្រ ឬសហគ្រាសណាមួយ ត្រូវកំណត់ទីតាំងនោះ ជា «តំបន់ក្រហម»។ ពេលកំណត់ជា «តំបន់ក្រហម» គឺត្រូវហាមឃាត់ការចេញចូលទីតាំងនោះ និងសកម្មភាពមួយចំនួនទៀត។

    របាយការណ៍របស់ខេត្តព្រះសីហនុ បានឱ្យដឹងថា រហូតមកដល់ពេលនេះ ខេត្តមានអ្នកកើតជំងឺកូវីដ១៩ សរុបប្រមាណ ៣,០៥៤នាក់។ ក្នុងនោះស្លាប់ ១២នាក់, ព្យាបាលជាសះស្បើយ ២,២២៦នាក់ និងកំពុងសម្រាកព្យាបាល ៨១៦នាក់៕

    ហាមដាច់ខាតការយកអត្ថបទពីវេបសេយ www.baykdang.com ដោយគ្មានការអនុញ្ញាតិ។ បើលោកអ្នក ត្រូវការអត្ថបទ សូម inbox ទៅហ្វេសប៊ុកផេច [email protected]

    ព័ត៌មានទាក់ទង៖

  • ព័ត៌មានថ្មីៗ