ប្រិយមិត្តជាច្រើនបានផ្ញើសារចង់អំពីសុខទុក្ខ និងសុខភាពរបស់ ឱក សុគន្ធកញ្ញា ចាប់តាំងពីមានព័ត៌មានថា នាង និងក្រុមគ្រួសារមានជាប់សង្ស័យជាមួយករណីកូវីដ១៩ដែលបានរាលដាលនៅក្នុងផលិតកម្មហង្សមាស ធ្វើឲ្យមិត្តរួមទ្រនំជាច្រើនបានឆ្លង។
ករណីសង្ស័យនោះ ដំបូងឡើយ មានចចាមអារ៉ាមថា សុគន្ធកញ្ញា និងក្រុមគ្រួសារបានភ្លាត់ឆ្លងជំងឺផ្លូវដង្ហើមកាចសាហាវនោះដែរទៅហើយ។ ប៉ុន្តែភ្លាមៗ សាមីខ្លួនបានចេញមុខបញ្ជាក់ពីករណីនេះ នាងមិនរងការឆ្លងជំងឺសាហាវដូចចចាមអារ៉ាមនោះទេ។ បន្ថែមពីលើនេះ កញ្ញា ថែមទាំងបញ្ចេញលទ្ធផលធ្វើតេស្តលើកទី១របស់នាងទៀតថា អវិជ្ជមានកូវីដ១៩ កាលពីថ្ងៃទី ១០ មីនា។
ទោះយ៉ាងណា សាមីខ្លួនបានអះអាងថា ប៉ុន្មានថ្ងៃកន្លងមក ប្រិយមិត្តរបស់នាងជាច្រើននៅតែផ្ញើសួរសុខទុក្ខ និងចង់ដឹងពីស្ថានភាពសុខភាពរបស់នាងនាពេលបច្ចុប្បន្ន។ ដូច្នេះហើយ នៅថ្ងៃនេះ គេឃើញតារាស្រី បានចេញមកបញ្ជាក់ជាថ្មី។ “នាងខ្ញុំសូមជូនដំណឹងថាសុខភាពរបស់នាងខ្ញុំ និងក្រុមគ្រួសារ មិនមានអ្វីប្រែប្រួលគួរឲ្យកត់សម្គាល់នោះទេ គឺនៅតែមានសុខភាពល្អធម្មតា”។
កញ្ញា ប្រាប់បន្តថា នាងកំពុងស្ថិតអំឡុងពេលរង់ចាំ សម្រាប់ការធ្វើតេស្តរកមេរោគកូវីដ១៩តំណាក់កាលទី២បន្តទៀត ដើម្បីឲ្យប្រាកដថា នាងមាន ឬមិនមានមេរោគកំណាចនេះ។
ត្រឹមរយៈពេល១សប្ដាហ៍ គេរកឃើញថា មានសិល្បករ ហង្សមាសជាច្រើនបានជាប់ពាក់ព័ន្ធនឹងករណីកូវីដ១៩ ដែលបានផ្ទុះនៅក្នុងស្ថានីយកាលពីថ្ងៃទី ៨មីនា ដែលបង្ខំឲ្យស្ថានីយទូរទស្សន៍ដ៏ធំនេះ បង្ខំចិត្តផ្អាកដំណើរការកម្មវិធីសំខាន់ៗមួយចំនួន។ សិល្បករដែលរកឃើញវិជ្ជមាន មាន អ្នកនាង ចាន់ កែវនិមល ណុប បាយ៉ារិទ្ធិ សុគន្ធ និសា វី ឌីណែត គ្រូភ្លេង សាន់ សុវណ្ណឌីន និងលោក ប៉ ។
ក្រៅពីនេះ សុខ ស្រីនាង ផន ស្រីខួច កែវ សុបញ្ញា ជាដើម បាននិងកំពុងធ្វើចត្តាឡីស័កនៅផ្ទះ និងត្រៀមសម្រាប់ការធ្វើតេស្តលើកទី២រកមេរោគកូវីដ១៩ដូច ឱក សុគន្ធកញ្ញា ដែរ៕
