• យល់ដឹងអំពី «ដើមកំណើតនៃពិធីបុណ្យ Thanksgiving» នៅសហរដ្ឋអាមេរិក

    (បរទេស)៖ ពិធីបុណ្យ Thanksgiving គឺជាទិវាបុណ្យជាតិមួយរបស់សហរដ្ឋអាមេរិក ហើយបុណ្យ Thanksgiving ឆ្នាំ២០២០ ត្រូវបានប្រារព្ធឡើងកាលពីថ្ងៃព្រហស្បតិ៍ ទី២៦ ខែវិច្ឆិកា។ ពិធីបុណ្យនេះត្រូវគេចាត់ទុកថា មានដើមកំណើតដំបូងកាលពីឆ្នាំ១៦២១ ក្នុងទម្រង់ជាពិធីជប់លៀងក្នុងឱកាសប្រមូលផលដំណាំរួចនារដូវស្លឹកឈើជ្រុះ ដែលរៀបចំឡើងនៅក្រុមអ្នកតាំងអាណានិគមអង់គ្លេស នៅក្រុងភ្លីម៉ោស (Plymouth) និងក្រុមកុលសម្ព័ន្ធជនជាតិដើមអាមេរិក វ៉ាមផាណូអាក (Wampanoag)។

    អស់រយៈពេលជាងពីរសតវត្សរ៍មកនេះ ពិធីបុណ្យ Thanksgiving នេះត្រូវបានធ្វើការប្រារព្ធឡើងរៀងៗខ្លួនតាមអាណានិគមនិងរដ្ឋនីមួយៗ។ ទាល់តែមកដល់ឆ្នាំ១៨៦៣ អំឡុងសង្គ្រាមស៊ីវិលអាមេរិក ទើបលោកប្រធានាធិបតី អាប្រាហាម លីនខូន (Abraham Lincoln) បានចេញសេចក្ដីប្រកាសកំណត់យកថ្ងៃ Thankgiving រួមមួយ ដែលត្រូវប្រារព្ធឡើងក្នុង ខែវិច្ឆិកាជារៀងរាល់ឆ្នាំ។

    * ប្រវត្តិពិធី Thanksgiving នៅក្រុង Plymouth

    កាលពីខែកញ្ញា ឆ្នាំ១៦២០ កូនសំពៅមួយដែលមានឈ្មោះថា Mayflower រួមជាមួយនឹងអ្នកដំណើរប្រមាណជាង ១០២នាក់ បានចាកចេញពីទីក្រុង Plymouth របស់អង់គ្លេស ដើម្បីស្វែងរកទីជម្រកថ្មីនៅទ្វីបអាមេរិក ដែលសម័យនោះត្រូវពួកអឺរ៉ុបចាត់ទុកជា ដែនដីថ្មីដ៏សន្លាងមួយ។

    ក្នុងការធ្វើដំណើរឆ្លងសមុទ្រដ៏លំបាកអស់រយៈពេលជាច្រើនសប្តាហ៍ ពួកគេបានមកដល់ដែនដីថ្មីហើយចាប់ផ្តើមកសាងទីលំនៅថ្មីរបស់ខ្លួន ហៅថាក្រុង Plymouth គឺដូចឈ្មោះទីក្រុងដែលពួកគេបានចាកចេញពីអង់គ្លេសយ៉ាងដូច្នោះ។ យោងតាមកំណត់ត្រាប្រវត្តិសាស្រ្តអាមេរិក អ្នកតាំងអាណានិគមអង់គ្លេសទាំងនោះ បានទទួលការស្វាគមន៍ពីក្រុមជនជាតិដើមអាមេរិក។

    ចំពោះមុខដែនដីដ៏ថ្មីសន្លាងដែលពួកគេមិនធ្លាប់ស្គាល់ អ្នកតាំងអាណានិគមទទួលបានការបង្ហាត់បង្រៀនឲ្យដាំដុះនិងប្រមូលផលផ្លែពោត ចាប់ត្រីក្នុងទន្លេ និងចៀសវាងពីរុក្ខជាតិពុលជាដើម។ មិនតែប៉ុណ្ណោះពួកគេក៏បានផ្សាភ្ជាប់ទំនាក់ទំនងរឹងមាំជាមួយកុលសម្ព័ន្ធឈ្មោះថា Wampanoag ផងដែរ។

    នៅឆ្នាំ១៦២១ បន្ទាប់ពីជោគជ័យនៃការប្រមូលភោគផលដំណាំពោតលើកដំបូងនៅដែនដីថ្មី លោកអភិបាល វីលាម ប្រេដហ្វដ (William Bradford) បានរៀបចំកម្មវិធីហូបអាហារអបអរមួយ ហើយបានអញ្ជើញបណ្តាកុលសម្ព័ន្ធជនជាតិដើមអាមេរិក ដែលជាសម្ព័ន្ធមិត្តរបស់ក្រុងអាណានិគមទើបបង្កើតថ្មីនេះ ក្នុងនោះព្រមទាំងពីមេកុលសម្ព័ន្ធ Wampanoag ផងដែរ។

    ព្រឹត្តិការណ៍នោះ ត្រូវមនុស្សភាគច្រើនចាត់ទុកជាថ្ងៃបុណ្យ Thanksgiving ដំបូងបង្អស់របស់សហរដ្ឋអាមេរិក ប៉ុន្តែពាក្យ Thanksgiving នេះ ប្រហែលជាមិនទាន់ត្រូវបានប្រើប្រាស់ជាផ្លូវការពេលនោះទេ ហើយវាប្រព្រឹត្តទៅរយៈពេលពេលបីថ្ងៃ ហើយមានមុខម្ហូបអ្វីខ្លះ ក៏គេមិនបានដឹងច្បាស់ដែរ។

    * ពិធីបុណ្យ Thanksgiving ក្លាយជាទិវាជាតិមួយរបស់អាមេរិក

    អំឡុងនិងក្រោយសម័យបដិវត្តន៍អាមេរិក ថ្ងៃ Thanksgiving បានចាប់ផ្តើមមានការទទួលស្គាល់បន្តបន្ទាប់ពីរដ្ឋាភិបាលនៃសហរដ្ឋអាមេរិក។ នៅឆ្នាំ១៨១៧ ញូយ៉កបានស្ថិតក្នុងចំណោមរដ្ឋដំបូងៗ ដែលបានអនុម័តឲ្យមានថ្ងៃឈប់សម្រាក Thanksgiving ប្រចាំឆ្នាំ ប៉ុន្តែវាប្រារព្ធឡើង នៅថ្ងៃខុសៗគ្នា ហើយទំនៀមទម្លាប់ Thanksgiving នេះ មិនទាន់ត្រូវបានស្គាល់ទូលំទូលាយនៅតំបន់ភាគខាងត្បូងសហរដ្ឋអាមេរិកនៅឡើយទេ។

    មកដល់ឆ្នាំ១៨៦៣ ស្របពេលដែលសង្រ្គាមស៉ីវិលស្ថិតក្នុងដំណាក់កាលក្តៅគគុកបំផុត លោក Abraham Lincoln បានកំណត់យកថ្ងៃព្រហស្បតិ៍ក្នុងសប្ដាហ៌ចុងក្រោយបំផុតនៃខែវិច្ឆិការ សម្រាប់ប្រារព្ធពិធីបុណ្យ Thanksgiving ហើយវាត្រូវបានអនុវត្តតៗមកជារៀងរាល់ឆ្នាំរហូតមកទល់ឆ្នាំ១៩៣៩ នៅពេលលោក ហ្រ្វេងឃ្លីន ឌី រ៉សស៊្វែល (Franklin D. Roosevelt) រំកិលថ្ងៃបុណ្យនេះមកខាងមុខមួយសប្តាហ៍វិញ។

    លោក Roosevelt បានធ្វើយ៉ាងដូច្នោះក្នុងគោលបំណងចង់ជំរុញឲ្យមានសន្ទុះនៃការទិញទំនិញ អំឡុងវិបត្តិសេដ្ឋកិច្ចសកល Great Depression។ ប៉ុន្តែគម្រោងរបស់លោក Roosevelt ទទួលបានការប្រឆាំងយ៉ាងខ្លាំងខ្លា។ លុះក្រោយមកនៅក្នុងឆ្នាំ១៩៤១ លោក Roosevelt បានបង្ខំចិត្តចុះហត្ថលេខាលើច្បាប់ ដែលកំណត់យកថ្ងៃព្រហស្បតិ៍ក្នុងសប្តាហ៍ទីបួននៃខែវិច្ឆិកា ធ្វើជាថ្ងៃនៃការប្រារព្ធពិធីបុណ្យ Thanksgiving ដូចដើមវិញ។

    * ប្រពៃណីនិងទំនៀមទម្លាប់នៃការរៀបចំបុណ្យ Thanksgiving

    បច្ចុប្បន្ន គេសង្កេតឃើញថាពិធីបុណ្យ Thanksgiving ផ្តោតជាសំខាន់ទៅលើការជួបជុំពិសាអាហារជាមួយក្រុមគ្រួសារឬមិត្តភក្តិ ដែលហាក់បានបាត់បង់ភាគច្រើននៃអត្តសញ្ញាណដំបូងនៃពិធីបុណ្យនេះ។ ពាក់ព័ន្ធនឹងមុខម្ហូបវិញគឺសត្វមាន់តួកគី (Turkey) ជាគ្រឿងសម្គាល់ដ៏លេចធ្លោប្រចាំពិធីបុណ្យ Thanksgiving។ ប្រជាជនអាមេរិកខ្ទង់៩០ភាគរយ តែងនាំគ្នាបរិភោគសត្វមាន់នេះ នៅថ្ងៃ Thanksgiving អមជាមួយម្ហូបអាហារប្រពៃណីមួយចំនួនទៀត ការដង្ហែក្បួនព្យុហយាត្រាក៏បានក្លាយជាផ្នែកដ៏សំខាន់មួយនៃពិធីបុណ្យនេះផងដែរ នៅតាមទីក្រុងនិងទីប្រជុំជនទូទាំងសហរដ្ឋអាមេរិក។

    ដោយសារសម័យឥឡូវ សមាជិកគ្រួសារភាគច្រើនរស់នៅឆ្ងាយៗពីគ្នា បុណ្យ Thanksgiving បានក្លាយជាឱកាសដ៏សំខាន់ប្រចាំឆ្នាំសម្រាប់ ឲ្យពួកគេមានពេលវេលាជួបជុំគ្នាយ៉ាងហោចមួយឆ្នាំម្តង។ មួយវិញទៀត ពិធីបុណ្យនេះឥឡូវក៏បានបើកទូលាយឲ្យជនអន្តោប្រវេសន៍ មិនថាសាវតារមកពីណាឡើយ គឺមានឱកាសចូលរួមប្រារព្ធបានគ្រប់ៗគ្នា។

    គួរបញ្ជាក់ថា នៅឯប្រទេសកាណាដាឯណោះវិញ ក៏មានថ្ងៃ Thanksgiving ដូចគ្នាដែរ ដែលមានប្រភពចេញមកតាំងពីសម័យអាណានិគម ប៉ុន្តែប្រារព្ធពេលខុសគ្នា គឺបុណ្យ Thanksgiving នៅកាណាដាធ្វើឡើងជារៀងរាល់ថ្ងៃចន្ទក្នុងសប្តាហ៍ទីពីរ នៃខែតុលា៕

    ហាមដាច់ខាតការយកអត្ថបទពីវេបសេយ www.baykdang.com ដោយគ្មានការអនុញ្ញាតិ។ បើលោកអ្នក ត្រូវការអត្ថបទ សូម inbox ទៅហ្វេសប៊ុកផេច [email protected]

    ព័ត៌មានទាក់ទង៖

  • ព័ត៌មានថ្មីៗ