ភ្នំពេញ ៖ ក្រសួងទេសចរណ៍បន្តការលើកលែងការបង់ថ្លៃបន្តអាជ្ញាបណ្ណទេសចរណ៍គ្រប់ប្រភេទ នៅក្នុងវិស័យទេសចរណ៍សម្រាប់ឆ្នាំ២០២១ នឹងចាប់ផ្តើមអនុវត្តពីថ្ងៃទី០១ ខែមករាឆ្នាំ២០២១ ដល់ថ្ងៃទី៣១ខែធ្នូឆ្នាំ ២០២១។
ការលើកលែងនេះគឺដើម្បីជួយរក្សាលំនឹងអាជីវកម្មនិងជីវភាពនិយោជិកកម្មករក្នុងវិស័យទេសចរណ៍ ដែលវិស័យទេសចរណ៍ទទួលរងផលប៉ះពាល់ធ្ងន់ធ្ងរពីការរីករាលដាលនៃជំងឺកូវីដ១៩ និង វិធានការស្តារ និងជំរុញកំណើនសេដ្ឋកិច្ចក្រោយវិបត្តិកូវីដ១៩។
ក្រសួងទេសចរណ៍បានណែនាំឲ្យ អភិបាលរាជធានី ខេត្ត អនុវត្តវិធានការនេះឲ្យបានម៉ឺងម៉ាត់ និងមានប្រសិទ្ធភាព ដែលស្ថិតនៅក្រោមការគ្រប់គ្រងរបស់អង្គភាពច្រកចេញចូលតែមួយរាជធានីខេត្ត និងការិយាល័យច្រកចេញចូលតែមួយក្រុង ស្រុក ខណ្ឌ។ ក្នុងន័យនេះ ប្រតិបត្តិករទេសចរណ៍នៅតែមានកាតព្វកិច្ចស្នើសុំអាជ្ញាបណ្ណទេសចរណ៍សម្រាប់ឆ្នាំ២០២១ ហើយការស្នើសុំអាជ្ញាបណ្ណទេសចរណ៍ថ្មី គ្រប់ប្រភេទនិងការអនុវត្តការពិន័យអន្តរការណ៍ជាប្រាក់សម្រាប់អាជ្ញាបណ្ណទេសចរណ៍ហួសុពលភាព ត្រូវរក្សាការអនុវត្តការបង់កម្រៃដដែល។
ក្រសួងទេសចរណ៍បានឲ្យដឹងថាក្រុមហ៊ុនដែលធ្វើអាជីវកម្មក្នុងវិស័យទេសចរណ៍ចំនួន ២,៨៣៨ អាជីវកម្ម ត្រូវបានផ្អាកឬបិទជាបណ្តោះអាសន្នចាប់តាំងពីខែកញ្ញាឆ្នាំនេះ ដែលនាំឱ្យមានការបាត់បង់ការងារចំនួន ៥០.៩៩៦ នៅក្នុងវិស័យនេះ៕
