(ញូវយ៉ក)៖ ជើងខ្លាំងប្រដាល់សកលមិនដែលចាញ់ Floyd Mayweather នឹងឡើងសង្វៀនជាថ្មីម្តងទៀត ដោយត្រូវប៉ះជាមួយកីឡាករវ័យក្មេង Logan Paul នៅក្នុងព្រឹត្តិការណ៍តាំងពិព័រណ៍ដែលនឹងធ្វើឡើងនាខែកុម្ភៈ ឆ្នាំ២០២១។
គួររំលឹកផងថា ការប្រកួតចុងក្រោយរបស់ Floyd បានយកឈ្នះជើងខ្លាំងជប៉ុន Tenshin Nasukawa ដោយប្រើពេលត្រឹមតែ ១៤០វិនាទីកាលឆ្នាំ២០១៨ បន្ទាប់ពីយកឈ្នះជើងខ្លាំងប្រដាល់ដាក់ទ្រុង (MMA) Conor McGregor ក្នុងឆ្នាំ២០១៧។
កីឡាករអាមេរិក Floyd Mayweather វ័យ ៤៥ឆ្នាំ ជាអតីតម្ចាស់ខ្សែក្រវាត់ ៥ប្រភេទទម្ងន់ផ្សេងគ្នា បានសម្រេចឡើងសង្វៀនជាថ្មីដោយប៉ះគូប្រជែងអាមេរិកដូចគ្នា Logan Paul ដែលធ្លាប់ប្រកួតលក្ខណៈអាជីពទើបបានម្តងប៉ុណ្ណោះកាលឆ្នាំខែវិច្ឆិកា ឆ្នាំ២០១៩។
ការប្រកួតរវាង Floyd និង Paul នឹងធ្វើឡើងនៅថ្ងៃទី២០ ខែកុម្ភៈ ដែលត្រូវបានគេរំពឹងថា នឹងអាចទាក់ទាញអ្នកចូលមើលច្រើនផងដែរ នៅពេលដែល Floyd ដែលបានកំពុងកាន់កំណត់ត្រាប្រកួត ៥០លើកមកនេះ មិនដែលចាញ់ និងស្មើឡើយ៕
