• Amazon គ្រោងយកលុយ ១០០លានដុល្លារ ចែកឲ្យបុគ្គលិក Zoox ក្នុងគោលបំណងចងជើងបុគ្គលិក

    (អាមេរិក)៖ ក្រុមហ៊ុន Amazon.com Inc គ្រោងនឹងបង្កើតប្រាក់រង្វាន់លើកទឹកចិត្តយ៉ាងតិច ១០០លានដុល្លារ ដើម្បីរក្សាបុគ្គលិកប្រមាណជាង ៩០០នាក់ ដែលកំពុងធ្វើការងារនៅក្នុងក្រុមហ៊ុន Zoox ដែលខ្លួនបានទិញកាលពីពេលថ្មីៗនេះ។ នេះបើយោងតាមការចេញផ្សាយរបស់សារព័ត៌មាន Reuters នៅថ្ងៃទី១០ ខែកក្កដា ឆ្នាំ២០២០។

    ក្រុមហ៊ុន Amazon បានបញ្ជាក់ថា ទឹកប្រាក់ ១០០លានដុល្លារអាមេរិកនេះ នឹងផ្ដល់ជាភាគហ៊ុនទៅឱ្យបុគ្គលិកដែលស្ម័គ្រចិត្តបន្តធ្វើការងារនៅក្នុង ក្រុមហ៊ុន Zoox ចំណែកបុគ្គលិកដែលសម្រេចចិត្តដើរចេញ ក្រុមហ៊ុនមិនបានផ្ដល់ប្រាក់រង្វាន់នេះឡើយ។

    មូលហេតុដែលក្រុមហ៊ុន Amazon ធ្វើដូច្នេះ ត្រូវបានប្រភពជិតស្និទ្ធបានបង្ហើបឱ្យដឹងថា នៅមុនពេលក្រុមហ៊ុន Zoox សម្រេចចិត្តលក់ឱ្យ Amazon គឺ Zoox បានដាក់លក្ខខណ្ឌមួយគឺ «Key Employees» ដែលនៅក្នុងនោះ Zoox បានកំណត់ថា ក្រោយពីទិញ Amazon ត្រួវរក្សាបុគ្គលិករបស់ខ្លួន ជាពិសេសគឺផ្ដល់នូវរង្វាន់ផ្សេងៗ ហើយចំណុចនេះដែរ គឺដើម្បីជំរុញទឹកចិត្តបុគ្គលិកឱ្យប្រឹងប្រែងធ្វើការងារកាន់តែខ្លាំង ដោយព្រោះថា ពួកគាត់មិនមែន ធ្វើការដើម្បីទទួលបានតែប្រាក់ខែនោះទេ គឺគាត់ធ្វើការងារដើម្បីក្រុមហ៊ុនខ្លួនឯងផងដែរ។

    គួរបញ្ជាក់ផងដែរថា កាលពីថ្មីៗនេះ ក្រុមហ៊ុនលក់ទំនិញអនឡាញយក្សរបស់អាមេរិក Amazon បានប្រកាសឱ្យដឹងថា ខ្លួនបានទិញក្រុមហ៊ុន Zoox ដែលត្រូវបានគេស្គាល់ថា ជាក្រុមហ៊ុនបច្ចេកវិទ្យាផលិតរថយន្តបើកបរដោយស្វ័យប្រវត្តិ ទើបតែបង្កើតឡើងបាន៦ឆ្នាំប៉ុណ្ណោះ ខណៈតម្លៃ នៃការទិញត្រូវបានគេដឹងថាប្រហែលជា ១.២ពាន់លានដុល្លារ។

    នៅក្នុងសេចក្ដីប្រកាស Amazon បានលើកឡើងថា «ចក្ខុវិស័យនៃការធ្វើដំណើរដោយស្វយ័តនឹងក្លាយជាការពិត» ប៉ុន្តែ Amazon មិនបានបង្ហាញពីគោលបំណង ច្បាស់លាស់នៃការទិញក្រុមហ៊ុន Zoox ឡើយ ដោយគ្រាន់តែបញ្ជាក់ថា ប្រតិបត្តិការរបស់ក្រុមហ៊ុន Zoom គឺនៅដូចដើម ដោយមិនមានការជ្រៀតជ្រែងពី Amazon ឡើយ ពោលគឺលោកស្រី Aicha Evans នៅតែបន្តកាន់តំណែងជានាយកប្រតិបត្តិ (CEO) ចំណែកលោក Jesse Levinson ដែលជាសហស្ថាបនិក នៅតែកាន់តំណែងជាប្រធានបច្ចេកវិទ្យា (CTO) ដដែល៕

    ហាមដាច់ខាតការយកអត្ថបទពីវេបសេយ www.baykdang.com ដោយគ្មានការអនុញ្ញាតិ។ បើលោកអ្នក ត្រូវការអត្ថបទ សូម inbox ទៅហ្វេសប៊ុកផេច [email protected]

    ព័ត៌មានទាក់ទង៖

  • ព័ត៌មានថ្មីៗ