• នារីរូបស្រស់ស្អាត ២នាក់ បើករថយន្តរេចង្កូតបុករថយន្តដឹកមាន់ពេញទំហឹង កៀបជាប់ព្រូឡានរងរបួសជើងទាំងសងខាង

    រាជធានីភ្នំពេញ ៖ នារីរូបស្រស់ពីរនាក់ បើករថយន្តកាមរីមួយគ្រឿង ខ្វះការប្រុងប្រយ័ត្នបានរេចង្កូតទៅកន្លងផ្លូវម្ខាងទៀត ទៅបុករថយន្តកូរ៉េដឹកមាន់ពេញទំហឹង បណ្ដាលឲ្យខ្ទេចមួយកំណាត់មុខ និងកៀបជាប់ព្រូឡានរងរបួសជើងទាំងសងខាង ត្រូវបានបងប្អូនប្រជាពលរដ្ឋនាំគ្នាជួយសង្គ្រោះយកចេញមកខាងក្រៅ បង្កភ្ញាក់ផ្អើលយ៉ាងខ្លាំង កាលពីវេលាម៉ោង០១:៣០នាទីយប់ រំលងអាធ្រាត្រឈានចូលថ្ងៃទី០៨ ខែកក្កដា ឆ្នាំ២០២០នេះ នៅចំណុចមុខផ្ទះម៉ាស្សាកោសជប់មួយកន្លែង តាមបណ្តោយផ្លូវ៣៧១ ក្នុងសង្កាត់ដង្កោ ខណ្ឌដង្កោ រាជធានីភ្នំពេញ។

    ប្រភពព័ត៌មានពីកន្លែងកើតហេតុបានឱ្យដឹងថា នៅមុនពេលកើតហេតុ គេបានឃើញរថយន្តកូរ៉េដឹកទំនិញមួយគ្រឿង ពណ៌ស ពាក់ស្លាកលេខភ្នំពេញ 2AK-8240 ដែលជារថយន្តដឹកមាន់ បើកបរដោយបុរសម្នាក់ និងអ្នករួមដំណើរ៣នាក់ទៀតបានធ្វើដំណើរតាមបណ្ដោយផ្លូវ៣៧១ ទិសដៅពីលិចមកកើត ក្នុងល្បឿនល្មម លុះពេលដែលមកដល់ចំណុចកើតហេតុ ស្រាប់តែមានរថយន្តកាមរីមួយគ្រឿង ពណ៌ទឹកមាស ពាក់ស្លាកលេខភ្នំពេញ 2AF-1167 បើកបរដោយនារីរូបស្រស់ម្នាក់ និងម្នាក់ទៀតជាអ្នករួមដំណើរបានបើកបរតាមបណ្ដោយផ្លូវ៣៧១ ទិសដៅបញ្ច្រាសគ្នាពីកើតទៅលិចវិញ ក្នុងស្ថានភាពល្បឿនលឿន ខ្វះការប្រុងប្រយ័ត្ន បានរេចង្កូតទៅខាងឆ្វេងដៃចូលគន្លងម្ខាងទៀត ទៅបុកចំរថយន្តកូរ៉េដឹកមាន់ខាងលើ បណ្ដាលឲ្យរថយន្តទាំងពីរគ្រឿង រងការខូចខាតខ្ទេចមួយកំណាត់មុខទាំងពីរគ្រឿង ចំណែកឯរថយន្តកូរ៉េដឹកមាន់កៀបជាប់ព្រូម្នាក់ រងរបួសជើងទាំងសងខាង ត្រូវបានបងប្អូនប្រជាពលរដ្ឋ និងអ្នកដែលឃើញហេតុការណ៍ ជាពិសេសនារីម៉ាស្សាចេញមកជួយយកចេញពីក្នុងរថយន្ត ហើយនាំទៅលាងរបួសនៅក្នុងផ្ទះម៉ាស្សាសិនផងដែរ ។

    មួយសន្ទុះក្រោយមក គេឃើញថាមិត្តភក្កិរបស់នារីម្ចាស់រថយន្ដកាមរីបានបើករថយន្តមកដល់តាមក្រោយផងដែរ ។ រួចភាគីទាំងសងខាងបានសម្របសម្រួលគ្នាដែរ តែមិនទាន់ត្រូវគ្នា បង្កឱ្យមានការភ្ញាក់ផ្អើលដល់បងប្អូនប្រជាពលរដ្ឋ និងកម្លាំងសមត្ថកិច្ចប៉ុស្តិ៍នគរបាលបឹងទំពុនទី២ ចុះមកជួយអន្តរាគមន៍ដែរ ប៉ុន្តែកន្លែងកើតហេតុស្ថិតនៅក្នុងទឹកដីនៃសង្កាត់ដង្កោខណ្ឌដង្កោ ទើបទាក់ទងប្រាប់ទៅកម្លាំងប៉ុស្តិ៍នគរបាលដង្កោ ចុះមកធ្វើការសម្របសម្រួលនៅកន្លែងកើតហេតុវិញ។

    បច្ចុប្បន្នក្រោយពេលកើតហេតុភាគីនារីរូបស្រស់ទាំងពីរព្រមទទួលខុសត្រូវ ដោយយល់ព្រមហៅរថយន្តមកស្ទូចយករថយន្តទៅជួសជុលអោយដើម្បីបញ្ចប់រឿង មិនរំខានសមត្ថកិច្ចចុះមកវាស់វែងឡើយ ៕

    ហាមដាច់ខាតការយកអត្ថបទពីវេបសេយ www.baykdang.com ដោយគ្មានការអនុញ្ញាតិ។ បើលោកអ្នក ត្រូវការអត្ថបទ សូម inbox ទៅហ្វេសប៊ុកផេច [email protected]

    ព័ត៌មានទាក់ទង៖

  • ព័ត៌មានថ្មីៗ