ប្រិយមិត្តបានស្គាល់រួចមកហេីយ និស្សិតអាហារូបករណ៍នៅប្រទេសថៃ លោក ហុង ភារិន ដែលបានបង្ហាញសមត្ថភាព និងទេពកោសល្យនៃការចងចាំរបស់ខ្លួន នៅក្នុងកម្មវិធីបញ្ចេញសមត្ថភាពរបស់ទូរទស្សន៍ថៃ «Super 100» ដោយទទួលបានការកោតសរសើរ និងគាំទ្រយ៉ាងខ្លាំងពីគណៈកម្មការ ក៏ដូចជាមហាជននៅទូទាំងប្រទេស និងក្រៅប្រទេស ហើយត្រូវបានមហាជនប្រសិទ្ធនាមជា «អច្ឆរិយកម្ពុជា»។
អ្វីដែលកាន់តែពិសេសនោះ លោក ហុង ភារិន ដែលកាលពីពេលថ្មីៗនេះ ទេីបតែបានចូលរួមប្រកួតនៅក្នុងកម្មវិធីប្រកួតការចងចាំលំដាប់ពិភពលោកលើកទី២៨ (The 28th world memory championships) ។ គួររំលឹកដែរថា ចំពោះកម្មវិធីប្រកួតការចងចាំលំដាប់ពិភពលោកលើកទី២៨ (The 28th World Memory Championships) បានរៀបចំឡេីងនៅក្នុងក្រុង អ៊ូហាន ប្រទេសចិន ដែលមានការចូលរួមពីបេក្ខជនជាច្រេីនប្រមាណជាង៥០០នាក់មកពីប្រទេសជុំវិញពិភពលោក កម្មវិធីប្រកួតបានប្រព្រឹត្តទៅកាលពីថ្ងៃទី៥ ខែធ្នូ ដល់ថ្ងៃទី៧ ខែធ្នូ ដែលមានរយៈពេល៣ថ្ងៃ ។
ចំណែកឯលទ្ធផលនៃការប្រកួតការចងចាំលំដាប់ពិភពលោកលើកទី២៨ (The 28th world memory championships) ដែលបានរៀបចំឡេីងនៅប្រទេសចិន លោក ហុង ភារិន មិនទទួលបានជ័យជម្នះនោះទេ ហេីយលោកក៏បានមានការតាំងចិត្តនឹងខិតខំប្រឹងប្រែងជាបន្តទៀតផងដែរ ដេីម្បីមកដណ្តេីមយកជ័យជម្នះសារជាថ្មីនៅឆ្នាំក្រោយជាបន្តទៀត។
ដោយឡែក កាលពីម្សិលមិញនេះដែរ លោក ហុង ភារិន បានចេញជាវីដេអូនិយាយទាក់ទងនឹងការចងចាំ ដែលនេះគឺជាវីដេអូដំបូងបំផុតសម្រាប់រូបលោកផ្ទាល់ ហេីយក៏សង្ឃឹមដែរថាវីដេអូមួយនេះអាចនឹងជាប្រយោជន៍ដល់បងប្អូនទាំងអស់គ្នាដែលមានបំណងចង់ហ្វឹកហាត់ក្នុងការចងចាំបានយ៉ាងល្អនោះ។ ដេីម្បីជ្រាបច្បាស់ សូមប្រិយមិត្តរីករាយទស្សនានូវឃ្លីបវីដេអូនេះដូចតទៅ។
