ទោះបីជាការប្រកួត បាល់ទាត់ ដណ្ដើមមេដាយសំរឹទ្ធ ក្នុងការប្រកួតកីឡា ស៊ីហ្គេម លើកទី៣០ នៅប្រទេសហ្វីលីពីន កម្ពុជាចាញ់មីយ៉ាន់ម៉ា ក៏ដោយសម្ដេចតេជោ ហ៊ុន សែន នាយករដ្ឋមន្រ្តីនៃកម្ពុជា បានចាត់ទុកការទាត់បាល់ ហ្វ្រីឃីគ របស់ កែវ សុខផេង ជាគ្រាប់បាល់ដ៏អស្ចារ្យ។
ក្នុងឱកាសពិធីប្រគល់សញ្ញាបត្រជូនដល់និស្សិតនៃសាកលវិទ្យាល័យឯកទេសនៃកម្ពុជា (CUS)សរុបចំនួន ៦,៧៦២នាក់នៅព្រឹកថ្ងៃនេះ សម្ដេចនាយករដ្ឋមន្ត្រីបានសំណុំពរដល់អ្នកគាំទ្រកម្ពុជាកុំស្ដីបន្ទោសដល់ខ្សែប្រយុទ្ធជួរមុខកម្ពុជា កែវ សុខផែង ដែលស៊ុតបាល់ប៉េណង់ទីមិនចូលក្នុងវគ្គកាត់សេចក្ដីបាល់ ១១ម៉ែត្រដណ្ដើមមេដាយសំរិទ្ធិ ទល់នឹងក្រុមអាយុក្រោម ២២ឆ្នាំមីយ៉ាន់ម៉ា នៃព្រឹត្តិការណ៍កីឡាស៊ីហ្គេម ២០១៩ នៅប្រទេសហ្វីលីពីន កាលពីម្សិលមិញនេះ។
ចំពោះការស៊ុតបាល់ប៉េណាល់ទីមិនចូលរបស់ កែវ សុខផេង នេះ សម្តេចបានលើកទឹកចិត្ត ពោលគឺប្រាប់ កែវ សុខផេង កុំឱ្យបាក់ទឹកចិត្តឱ្យសោះ ព្រោះកីឡាករលំដាប់ពិភពលោកដូចជា David Beckham ក៏ស៊ុតមិនចូលដែរពេលខ្លះ។ ហើយម្យ៉ាងទៀត កម្ពុជា បានបង្កើតប្រវត្តិសាស្រ្តក្នុងការឈានចូលដល់វគ្គពាក់កណ្តាលផ្តាច់ព្រ័ត្រ ដោយសម្តេចបានកោតសរសើរចំពោះទម្រង់លេងរបស់ក្រុមកម្ពុជា និងបានចាត់ទុកការទាត់ហ្វ្រីឃីករបស់ កែវ សុខផេង គឺជាគ្រាប់បាល់ដ៏ល្អថែមទៀតផង។
