ខេត្តបន្ទាយមានជ័យនៅប៉ុន្មានឆ្នាំកន្លងមកនេះ មានការអភិវឌ្ឍរីកចម្រើនគួរឲ្យកត់សម្គាល់ ពិសេសក្រុងប៉ោយប៉ែតតែម្តងដែលបានទាក់ទាញគម្រោងវិនិយោគជាច្រើនដូចជា មណ្ឌលពាណិជ្ជកម្ម និងផ្សារទំនើបជាដើមក្នុងទំហំសាច់ប្រាក់រាប់រយលានដុល្លារ។ ដោយឡែកកាលពីពេលថ្មីៗនេះ អាជ្ញាធរខេត្តបន្ទាយមានជ័យគ្រោងនឹងដាក់ឲ្យដំណើរការរថយន្តក្រុងសាធារណៈតភ្ជាប់ពីក្រុងប៉ោយប៉ែត ឆ្ពោះទៅស្រុកម៉ាឡៃ ខេត្តបន្ទាយមានជ័យជាលើកដំបូងក្នុងពេលឆាប់ៗនេះ។
យោងតាមប្រសាសន៍របស់អភិបាលខេត្តបន្ទាយមានជ័យបានឲ្យដឹងថា រដ្ឋបាលខេត្តបានសម្រេចឲ្យដំណើរការរថយន្តក្រុងសាធារណៈ ២០នាទីម្ដង ដែលតភ្ជាប់ចរាចរណ៍ទីប្រជុំជនទាំងពីរប្រើប្រាស់មុនគេ បន្ទាប់ពីទីក្រុងភ្នំពេញ។ ជាមួយគ្នានេះដើម្បីផ្ដល់ជូនប្រជាពលរដ្ឋដោយមិនគិតថ្លៃរយៈពេល ៣ ខែ ក្នុងគោលបំណងដើម្បីសម្រួលការធ្វើដំណើរ កាត់បន្ថយការចំណាយ កាត់បន្ថយគ្រោះថ្នាក់ចរាចរណ៍ ហើយធ្វើឲ្យជីវភាពប្រជាពលរដ្ឋកាន់តែល្អប្រសើរ។
សូមបញ្ជាក់ផងដែរសេវារថយន្តក្រុងនេះទទួលបានការគាំទ្រពីលោក ឧកញ៉ា ឡេង ណាវ៉ាត្រា ជាមួយនឹងរថយន្ត ១៥គ្រឿង និងអាចដាក់ឱ្យដំណើរការនៅឆ្នាំ២០២០ខាងមុខនេះ។ ប្រសិនបើដំណើរការទៅទទួលបានជោគជ័យនោះ នៅជំហានបន្ទាប់ នឹងអាចដាក់ឱ្យដំណើរការពីក្រុងប៉ោយប៉ែត ឆ្ពោះមកក្រុងសិរីសោភ័ណ បន្ថែមទៀត៕
