ក្រសួងពាណិជ្ជកម្មថៃបានឱ្យដឹងថា ការនាំចូលរថយន្តជជុះនឹងមិនត្រូវបានអនុញ្ញាតទៀតទេ ចាប់ពីថ្ងៃទី១០ ខែធ្នូ ឆ្នាំ២០១៩ ដោយសារអាជ្ញាធរចង់បង្កើនការទប់ស្កាត់ការបន្លំ ភាពមិនប្រក្រតី អំពើពុករលួយ និងការបំពុលបរិស្ថាន។ លោក Keerati Ratchano អគ្គនាយកនៃនាយកដ្ឋានពាណិជ្ជកម្មបរទេសនិយាយថា នាយកដ្ឋានរបស់លោកកំពុងត្រៀមហាមឃាត់ការនាំចូលរថយន្តជជុះទៅប្រទេសថៃ ដែលត្រូវបានណែនាំដោយក្រសួងពាណិជ្ជកម្ម។ ការហាមឃាត់នេះត្រូវបានប្រកាសជាលើកដំបូងនៅក្នុងខែកក្កដា ហើយនឹងចូលជាធរមាននៅថ្ងៃទី១០ ខែធ្នូ ខាងមុខនេះ។

កាសែត The Nation បានរាយការណ៍ថា ការលើកលែងមួយនឹងត្រូវធ្វើឡើងសម្រាប់យានជំនិះឯកទេស ដែលបានបរិច្ចាគដល់អង្គការមិនស្វែងរកប្រាក់ចំណេញ ឬរដ្ឋាភិបាល និងសហគ្រាសរដ្ឋ។ ទាំងនេះអាចរួមបញ្ចូលទាំងរថយន្តសណ្ដោង ត្រាក់ទ័រ រថយន្តសង្គ្រោះបន្ទាន់ ឬរថយន្តពន្លត់អគ្គីភ័យ។ ការហាមឃាត់នេះអនុវត្តតែចំពោះការនាំចូលរថយន្ត ដែលប្រើសម្រាប់ការប្រើប្រាស់ផ្ទាល់ខ្លួនប៉ុណ្ណោះ។ រថយន្តដែលត្រូវបានប្រើប្រាស់ផ្សេងទៀតដូចជា៖ យានយន្តការទូត, រថយន្តគំរូសម្រាប់ការស្រាវជ្រាវនិងការធ្វើតេស្ត, យានយន្តដែលត្រូវកែប្រែសម្រាប់នាំចេញ, យានយន្តសម្រាប់ដាក់តាំងសារមន្ទីរ និងរថយន្តយោធា គឺមិនរងផលប៉ះពាល់នោះឡើយ។

លោក Keerati បានបន្ថែមថា៖ «ទោះយ៉ាងណាដូចជាយានយន្តដែលត្រូវបាននាំយកមកកែប្រែ ហើយនាំចេញនាពេលក្រោយ ពួកសហគ្រិនត្រូវគោរពតាមបទបញ្ជារបស់នាយកដ្ឋានគយ និងអាជ្ញាធរឧស្សាហកម្មឧស្សាហកម្មថៃឱ្យបានច្បាស់លាស់បំផុត»៕