ប៉ូលិសនៃទីក្រុងឌុយបៃបានឲ្យតម្រុយថាប្រហែលជានឹងប្រើប្រាស់រថយន្តភីកអាប់អគ្គិសនី Tesla Cybertruck ដើម្បីល្បាតទីក្រុង នៅពេលរថយន្តនេះចេញលក់នៅឆ្នាំ ២០២១។
ប៉ូលិសឌុយបៃបានបង្ហោះរូបភាពរថយន្ត Cybertruck ដែលមានបិទនូវស្លាកសញ្ញា Dubai Polica កាលពីថ្ងៃអង្គារកន្លងទៅ។ គួរដឹងថាប៉ូលិសឌុយបៃមានប្រើប្រាស់រថយន្តទំនើបៗជាច្រើនរួចមកហើយក្នុងការល្បាតទីក្រុង។
រថយន្តទំនើបៗមានដូចជា Bugatti Veyron, Aston Martin One-77, Bentley Continental GT, Porsche Panamera Hybrid ចំនួនបី និងរថយន្ត BMW i8 ចំនួនពីរគ្រឿងជាដើម។
នាយកប្រតិបត្តិ Tesla លោក Elon Musk បានឲ្យតម្រុយលើ Twitter កាលពីថ្ងៃអង្គារថាក្រុមហ៊ុនរបស់ខ្លួនទទួលបានការកុម្ម៉ង់ទិញរថយន្ត Cybertruck នេះ ២៥ ម៉ឺនគ្រឿងមកហើយ។ ការកុម្ម៉ង់ទិញគឺតម្រូវឲ្យកក់លុយ ១០០ ដុល្លារ ដែលមានន័យថា Tesla អាចរកបានជាង ២៥ លានដុល្លារពីរថយន្តភីកអាប់អគ្គិសនីរបស់ខ្លួន។
Cybertruck មានតម្លៃចាប់ផ្ដើមពី ៣៩ ៩០០ ដុល្លារ ដល់ថ្លៃបំផុតគឺ ៦៩ ៩០០ ដុល្លារ ជាតម្លៃលើទីផ្សារសហរដ្ឋអាមេរិក៕
