ប្រធានាធិបតីអាមេរិច បានចុះហត្ថលេខាលើច្បាប់សិទ្ធិមនុស្ស និងប្រជាធិបតេយ្យ ដើម្បីគាំទ្រដល់ក្រុមអ្នកតវ៉ាប្រជាធិបតេយ្យនៅទីក្រុងហុងកុង។
ច្បាប់សិទ្ធិមនុស្ស និងប្រជាធិបតេយ្យនោះ នឹងផ្តល់សិទ្ធិឲ្យមានការត្រួតពិនិត្យប្រចាំឆ្នាំ ដើម្បីពិនិត្យមើលថាតើហុងកុង មានស្វ័យភាពគ្រប់គ្រាន់ទេ ក្នុងការបង្ហាញពីឋានៈពិសេសរបស់ខ្លួន ជាមួយនឹងសហរដ្ឋអាមេរិច។
លោកត្រាំបានថ្លែងថា លោកចុះហត្ថលេខាលើច្បាប់នោះគឺដើម្បីប្រធានាធិបតី ស៊ី ជីនពីង និងប្រជាជនហុងកុង។
ចំណែករដ្ឋាភិបាលហុងកុងវិញ បាននិយាយថា ច្បាប់នោះនឹងមានការបញ្ជូនសញ្ញាខុស និងមិនអាចសម្រួលដល់ស្ថានភាពនោះទេ។
ក្រសួងការបរទេសចិនបាននិយាយថា ខ្លួននឹងចាត់វិធានការឆ្លើយតប និងបានចោទប្រកាន់ទីក្រុងវ៉ាស៊ីនតោនថា មានចេតនាអាក្រក់។
ប្រព័ន្ធផ្សព្វផ្សាយចិន បានចុះផ្សាយថា “ច្បាប់នោះមិនចាំបាច់ និងមិនមានមូលដ្ឋាន” ហើយវានឹងបំផ្លាញដល់ទំនាក់ទំនងរវាងតំបន់ និងអាមេរិច។
សូមបញ្ជាក់ថា ទីក្រុងហុងកុងបានត្រូវញាំញីដោយបាតុកម្ម អស់រយៈពេលជាង ៥ខែមកហើយ ដែលការផ្ទុះបាតុកម្មដំបូង កើតឡើងដោយសារតែ ច្បាប់ធ្វើបត្យាប័នដែលមានការអនុញ្ញាតិ ឲ្យមានការបញ្ជូលជនសង្ស័យទៅធ្វើការកាត់ទោសនៅចិនបាន។
ទោះបីច្បាប់នេះ ត្រូវបានមេដឹកនាំហុងកុង គឺអ្នកស្រី Carrie Lam ប្រកាសបោះបង់ចោលក្តី ក៏ក្រុមបាតុករនៅមិនទាន់សុខចិត្ត ព្រោះពួកគេនៅទាមទារឲ្យរដ្ឋាភិបាល អនុវត្តចំណុចមួយចំនួនទៀត។
ហុងកុង ត្រូវបានអង់គ្លេសប្រគល់ឲ្យចិនកានកាប់វិញក្នុងឆ្នាំ ១៩៩៧ ក្រោមកិច្ចព្រមព្រៀង ប្រទេសមួយ ប្រព័ន្ធដឹកនាំពីរ៕
