ក្នុងឆ្នាំនេះ ក្រុមហ៊ុនហ្វេសបុក បានធ្វើការបិទគណនេយ្យក្លែងក្លាយចំនួន ៥,៤ពាន់លាននៅលើវេទិការបស់ខ្លួន ប៉ុន្តែគណនេយ្យក្លែងក្លាយរាប់លានទៀត ទំនងនៅមានលើបណ្តាញរបស់ខ្លួន។ នេះបើតាមការបញ្ជាក់របស់ក្រុមហ៊ុន នៅថ្ងៃពុធម្សិលមិញនេះ។
កាលពីឆ្នាំ ២០១៨ ក្រុមហ៊ុនបានធ្វើការបិទគណនេយ្យក្លែងក្លាយចំនួន ៣,៣ពាន់លាន។ ជារឿងរាល់ខែ មានគណនេយ្យក្លែងក្លាយចំនួន ៥ភាគរយ។
ប្រធានប្រតិបត្តិក្រុមហ៊ុនលោក Mark Zuckerberg បានហៅការបិទគណនេយ្យក្លែងក្លាយដ៏ច្រើនបែបនោះថា គឺជាសញ្ញាបញ្ជាក់ពីការប្រឹងប្រែង របស់ក្រុមហ៊ុនក្នុងការចាត់ការលើបញ្ហានោះ និងបានស្នើឲ្យក្រុមហ៊ុនផ្សេងៗទៀត ចាត់វិធាការស្រដៀងគ្នា។
លោកថ្លែងប្រាប់អ្នកសារព័ត៌មានដូច្នេះថា “ដោយសារតែចំនួនរបស់ពួកយើងខ្ពស់ វាមិនមែនមានន័យថា វាមានមាតិការដែលគំរាមកំហែងច្រើននោះទេ។ វាមានន័យថា យើងត្រូវខិតខំធ្វើការឲ្យខ្លាំងក្លាដើម្បីកំណត់មាតិការទាំងនោះ ហើយដូច្នេះទើបចំនួនវាខ្ពស់”។
សូមបញ្ជាក់ថា ចាប់តាំងពីបង្កើតឡើងក្នុងឆ្នាំ ២០០៤មក រហូតមកដល់ពេលនេះ ក្រុមហ៊ុនហ្វេសបុកមានអ្នកប្រើប្រាស់ សរុបទាំងអស់ប្រមាណ ២,៥ពាន់លាននាក់ទូទាំងពិភពលោក៕
