ដូចដែរប្រិយមិត្តបានទទួលជ្រាបរួចមកហេីយ ដែលកាលពីម្សិលមិញនេះ ស្ថានីយទូរទស្សន៍ Town Full HD TV បានបង្កើតព្រឹត្តិការណ៍ដ៏កក្រើកនៃការប្រកួតប្រដាល់កំរិតពិភពលោក ម៉ាសហ្វៃ គុណខ្មែរ (MAS Fight Kun Khmer) ដោយមានការអញ្ជើញចូលរួមប្រកួតពីសំណាក់កីឡាករប្រដាល់ ខ្មែរ និងបរទេសជាច្រើនរូប។
សូមជម្រាបដែរថា ចំពោះព្រឹត្តិការណ៍ប្រកួតនៅក្នុងកម្មវិធីប្រដាល់សេរីពិភពលោក Mas Fight Cambodia គឺមានចំនួន១០គូ ដែលក្នុងនោះមានគូខ្មែរប្រកួតជាមួយខ្មែរ ៣គូ និងគូខ្មែរប្រកួតជាមួយបរទេស និងបរទេសជាមួយបរទេសមានចំនួន ៧គូ។ ចំពោះការប្រកួតនេះ មានតែ ១ទឹកទេ និងមានរយៈពេល៩នាទី ចំណែកឯអាជ្ញាកណ្ដាលវិញគឺមានតែ១រូបទេ ដោយមិនមានគណ:កម្មការដាក់ពិន្ទុ ប្រសិនបើការប្រកួតផ្តួលដៃគូឲ្យសុំចុះចាញ់ ឬសន្លប់ មិនបានទេ មានន័យថាលទ្ធផលស្មើគ្នា។
ទន្ទឹមនឹងនេះដែរ ចំពោះព្រឹត្តិការណ៍ដ៏អស្ចារ្យនេះ ក៏មានវត្តមានស្តេចប្រដាល់ថៃ ប៊ូ ខាវ ចូលរួមប្រកួតផងដែរ ដែលជាការប៉ះគ្នាជាមួយ កីឡាករមកពីប្រទេសហូឡង់ Chris Ngimbi ចំណែកឯលទ្ធផលនោះ ស្តេចប្រដាល់ថៃ ប៊ូ ខាវ បានយកឈ្នះដៃគូរបស់ខ្លួន Chris Ngimbi ដោយបានវាយសន្លប់នៅនាទីទី៤និង១១វិនាទី។
ដោយឡែក បេីយោងតាមប្រភពព័ត៌មានពីអង្គភាព យុវជនជំនាន់ថ្មី បានឲ្យដឹងថា៖ «ប៊ូ ខាវ បានបញ្ជាក់អោយដឹងថា ការពិតទៅ រូបគេមិនសូវច្បាស់ថាខ្លួនគេមានឈាមជ័រជាខ្មែររឺអត់ទេ តែរូបគេបានកើតនៅលើទឹកដីខេត្តសុរិន្ទ ដែលជាអតីតខេត្តខ្មែរ ដែលបារាំងកាត់អោយទៅថៃ។ ខ្ញុំកើតនៅក្នុងខេត្តសុរិន្ទ តែសាវត្តាយ៉ាងណានោះខ្ញុំមិនសូវច្បាស់ទេ។ ខ្ញុំកើតនៅលើកទឹកដីអតីតរបស់ខ្មែរមែន តែពេលដែលខ្ញុំដឹងក្តីមក វាក្លាយទៅជាប្រទេសថៃហើយ ដូចនេះខ្ញុំមិនច្បាស់នោះទេ នេះជាការបញ្ជាក់របស់ស្តេចប្រដាល់ប្រទេសថៃ»៕
