ថ្មីៗនេះក្រុមហ៊ុនយក្សប្រទេសចិន Huawei បានប្រកាសពីភាពជោគជ័យលើការនាំចេញស្មាតហ្វូនប្រមាណ ២០០ លានគ្រឿងរួចមកហើយសម្រាប់ឆ្នាំ ២០១៩ ពោលគឺលឿនជាងដល់ទៅ ៦៤ ថ្ងៃ បើធៀបនឹងតួលេខធ្វើបានដូចគ្នានាឆ្នាំ ២០១៨។
ត្បិតវិវាទរវាងសហរដ្ឋអាមេរិក-ចិន ដែលឈានដល់ការហាមប្រាមមិនឲ្យផលិតផល Huawei ឈរជើងនៅទីផ្សារអាមេរិកក៏ដោយ ប៉ុន្តែទំហំនៃភាពរីកចម្រើនរបស់ស្មាតហ្វូនចិនហាក់ពុំចុះថមថយនោះទេ ផ្ទុយទៅវិញក្រុមហ៊ុនបានប្រើយុទ្ធសាស្រ្តបញ្ចុះតម្លៃទាញការគាំទ្រខ្លាំងលើជំនាន់ចុងក្រោយ Mate 30/Mate 30 Pro។
យ៉ាងណាមិញស្ថាបនិក Huawei លោក Ren Zhengfei ក៏បានទម្លាយទៅកាន់ប្រព័ន្ធផ្សព្វផ្សាយអឺរ៉ុបថាក្រុមហ៊ុនរបស់ខ្លួនមានគម្រោងនាំចេញស្មាតហ្វូនឲ្យបានដល់ទៅ ២៧០ លានគ្រឿងសម្រាប់រយៈពេលមួយឆ្នាំពេញ ពោលគឺច្រើនជាង ២០ លានគ្រឿងធៀបនឹងការព្យាករណ៍ទុកជាមុន។
គួរបញ្ជាក់ថាប្រសិន Huawei អាចធ្វើបានដូចការគិត នោះជាតួលេខល្អប្រសើរមួយ ខណៈ Samsung ដែលជាក្រុមហ៊ុនលំដាប់ទី ១ ក្នុងលោកកាលពីឆ្នាំ ២០១៨ នាំចេញបានត្រឹម ២៩០ លានគ្រឿង ហើយវាក៏ជាសញ្ញាវិជ្ជមានដើម្បីរុញឲ្យ Huawei ក្លាយជាក្រុមហ៊ុននាំមុខគេនៅប៉ុន្មានឆ្នាំខាងមុខផងដែរ៕
