ជំនួប Barcelona និង Real Madrid នៅចុងខែតុលាខាងមុខនេះ ត្រូវបានលើកពេល ដោយសារតែមានបញ្ហាសន្តិសុខនៅតំបន់កាតាឡាន់។ នេះបើតាម La Liga ប្រកាស។
ដើមឡើយជំនួប El Clasico នេះ ត្រូវធ្វើនៅថ្ងៃទី២៦ខែតុលាឆ្នាំ២០១៩នេះ នៅទឹកដី Barcelona ។ តែដោយសារបច្ចុប្បន្នតំបន់នេះកំពុងមានបាតុកម្មខ្លាំង ក៏ដូចជាហិង្សាកើតឡើងផងនោះ ទើបបានជាសហព័ន្ធបាល់ទាត់អេស្ប៉ាញបានព្យាយាមផ្លាស់ប្ដូរការប្រកួតមកលេងនៅ Bernabue វិញ។ ទាំង Real Madrid និង Barcelona មិនព្រមឡើយក្នុងការផ្លាស់ប្ដូរទីលានប្រកួតនេះ ទើបតម្រូវឱ្យ La Liga លើកការប្រកួតនេះសិន។
ប្រភពបានបញ្ជាក់ថានៅថ្ងៃចន្ទសប្ដាហ៍ក្រោយ ទើបដឹងកាលវិភាគច្បាស់ថាប្រកួតនៅថ្ងៃណា។ មានប្រភពមួយចំនួនបញ្ជាក់ថាអាចនឹងនៅខែក្រោយឯណោះ ពោលគឺទាល់តែបាតុករឈប់ធ្វើបាតុកម្ម អសន្តិសុខក្នុងតំបន់នេះសិន៕
