ប្រទេសចិនមិនមែនជាប្រទេសតែមួយទេដែលបានបង្កើនមាសបម្រុងរបស់ខ្លួន ដើម្បីកាត់បន្ថយការពឹងផ្អែកសេដ្ឋកិច្ចរបស់ខ្លួនលើប្រាក់ដុល្លារអាមេរិក។ យោងតាម Bloomberg ឱ្យដឹងថា ចាប់តាំងពីមានសង្គ្រាមពាណិជ្ជកម្មជាមួយអាមេរិក ប្រទេសចិនបានបន្ថែមមាសចំនួន ១០០តោន ចូលក្នុងឃ្លាំងបម្រុងរបស់ពួកគេ។ ហើយបើយោងតាមក្រុមប្រឹក្សាមាសពិភពលោក (World Gold Council) ក្នុងរយៈពេលកន្លះឆ្នាំនេះធនាគារកណ្តាលនៅទូទាំងពិភពលោក បានទិញមាសប្រមាណ ៣៧៤.១តោន ដោយហេតុនេះវាបានជំរុញតម្រូវការសរុបកាន់តែខ្លាំង ដែលធ្វើឱ្យមាសមានការកើនតម្លៃក្នុងកម្រិតខ្ពស់បំផុតធៀបនឹងរយៈពេលបីឆ្នាំចុងក្រោយនេះ។

មាសបម្រុងរបស់ចិនបានកើនឡើង ១០ខែជាប់គ្នា គិតមកដល់ខែកញ្ញានេះ ដោយសារធនាគារប្រជាជនចិន (PBOC) បានបង្កើនការកាន់កាប់មាសដ៏មានតម្លៃរបស់ខ្លួនដល់ទៅ ៦២.៦៤លានអោន (១,៩៥៧តោន) កាលពីខែមុន កើនពី ៦២.៤៥លានអោន (១,៩៥១តោន) ក្នុងខែសីហា។ នេះវាធ្វើឱ្យមាសបម្រុងទុករបស់ចិនមានប្រហែល ៩៣ពាន់លានដុល្លារអាមេរិក គិតជាប្រាក់។ បើនិយាយពីបរិមាណផលចុងក្រោយ លំហូរចូលចុងក្រោយមានចំនួនសរុប ៥.៩តោន និង ៩៩.៨ តោនផ្សេងទៀត ក្នុងរយៈពេលប្រាំបួនខែកន្លងមក៕