ខេត្តបាត់ដំបង៖ ស្នងការដ្ឋាននគរបាលខេត្តបាត់ដំបង បានឲ្យដឹងថា កាលពីថ្ងៃអាទិត្យ ទី២២ ខែកញ្ញា ឆ្នាំ២០១៩មានករណីហឹង្សាដោយចេតនាមានស្ថានទម្ងន់ទោស (កូនប្រើកាំបិតកាប់ឪពុក-ម្ដាយបង្កើត) មួយកើតឡើងនៅចំណុច ត្រាំសសរ ភូមិឆាយរំពាត់ ឃុំកន្ទឺ២ ស្រុកបាណន់ ខេត្តបាត់ដំបង។
ជនសង័្សយរូបនោះឈ្មោះ លុយ សុធី (ហៅជយ) ភេទប្រុស អាយុ ២៦ឆ្នាំ រស់នៅភូមិ ឃុំកើតហេតុ ខាងលើ បានប្រើកាំបិតកាប់ទៅលើឪពុកម្តាយបង្កើតរបស់ខ្លួន បណ្តាលឲ្យរងរបួសធ្ងន់ធ្ងរ និងបានបញ្ជូនទៅសង្រ្គោះនៅមន្ទីរពេទ្យ។
ជនរងគ្រោះទាំងពីរនាក់ប្តីប្រពន្ធនោះគឺ៖
១-ឈ្មោះ លុយ វ័រ ភេទប្រុស អាយុ ៦៧ឆ្នាំ (ឪពុកបង្កើត) រងរបួសធ្ងន់ត្រង់ក្បាលធ្ងន់ធ្ងរ។
២-ឈ្មោះ ស៊ុន ភាន ភេទស្រី អាយុ ៦២ឆ្នាំ (ម្ដាយបង្កើត) រងរបួសស្រាល ។
នៅពេលទទួលបានព័ត៌មាននេះ លោកវរសេនីយ៍ឯក ប៉ាន់ វណ្ណនី អធិការនគរបាលស្រុកបាណន់ បានចាត់ចែងធ្វើការស្រាវជ្រាវ រហូតឈានដល់ធ្វើការឃាត់ខ្លួនជនសង័្សយជាកូន ឈ្មោះលុយ សុធី (ហៅជយ)នេះ បានព្រមទាំងដកហូតយកកាំបិតជាភស្តុតាង ក្នុងការកាប់ប្រហារនេះផង នាថ្ងៃទី២៣ ខែ កញ្ញា ឆ្នាំ២០១៩។ លោកវរសេនីយ៍ឯក ប៉ាន់ វណ្ណនី បានឲ្យដឹងបន្ថែមថា ឈ្មោះ លុយ សុធី ហៅជយ ជាមនុស្សដែលមានស្មារតីវិបល្លាស ។ ទោះជាយ៉ាងណាក៏ដោយជនសង័្សយ និងវត្ថុតាង បានរៀបចំសំណុំរឿង បញ្ជូនទៅសាលាដំបូងខេត្តបាត់ដំបង ចាត់ការតាមផ្លូវច្បាប់៕
