បន្ទាប់ពីផ្ទុះព័ត៌មាន ឃាត់ខ្លួនបុរសម្នាក់ ក្រោយលួចបេះផ្លែស្វាយចំនួន២៤ផ្លែ និងធ្វើសកម្មភាពលួចនេះប្រហែលជាង២០លើក ស្រាប់តែពេលនេះលោកផែង វណ្ណៈ បានសួរថា៖ “ម្ចាស់សាឡង់ដឹកខ្សាច់បេីកបុកសរសរស្ពានព្រែកតាមាក់ មិនទាន់ឃេីញនគរបាលខេត្តកណ្ដាលចាប់វ៉ៃខ្នោះនៅឡេីយទេ ។ ចំណែកចោរលួចផ្លែស្វាយ ២០ ដង ចាប់វ៉ៃខ្នោះបានហេីយ ។ បងប្អូនពិចារណាទៅមេីល តេីទំហំខូចខាតមួយណាធំជាង ?”
សូមជម្រាបជូនថា៖ កាលពីថ្ងៃអាទិត្យ ១០កើត ខែភទ្របទ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី០៨ ខែកញ្ញា ឆ្នាំ២០១៩ វេលាម៉ោងប្រមាណ ១៣ និង៣០នាទី រសៀល នៅចំណុចភូមិសាស្រ្ត ស្រុកមុខកំពូល ខេត្តកណ្តាល មានករណីសាឡង់ដឹកខ្សាច់មួយគ្រឿង បើកបរដោយឈ្មោះ ភា រម្យ ភេទប្រុស អាយុ៣៩ឆ្នាំ រួមដំណើរដោយប្រពន្ធ និងកូនធ្វើដំណើរតាមបណ្តោយខ្សែទឹកពីត្បូងទៅជើង បានបើកបុកសសរស្ពានទី៨នៃស្ពានព្រែកតាមាក់ ទើរជាប់នឹងសរសេរ (ស្ថិតនៅចន្លោះសសរស្ពានសម្រាប់ធ្វើនាវាចរណ៍) ដោយសារបើកគេចពីនាវាទេសចរណ៍មួយគ្រឿងទៀតមានផ្ទុកមនុស្សច្រើនបើកបញ្ជ្រាសទិសគ្នាពីត្បូងទៅជើង ហើយត្រូវបានជួយសង្គ្រោះដោយទូកនេសាទរបស់បងប្អូនខ្មែរឥស្លាម។
សាឡង់ដឹកខ្សាច់នោះពាក់ផ្លាកលេខ ភព៦. ៨២៦៣ សំបកដែក ម៉ាស៊ីនម៉ាកMitsubishi មានបណ្តោយ ប្រវែង៤៣.៣០ម៉ែត្រ ទទឹង៨.០៥ ម៉ែត្រ ជម្រៅផ្ទុកខ្សាច់ពេញ ២.៥០ម៉ែត្រ តាមការប៉ាន់ស្មានមានទម្ងន់ សរុបប្រហែល៨០០តោន ជាកម្មសិទ្ធិរបស់ក្រុមហ៊ុន ង៉ូវ ចាន់ណា បានចុះបញ្ជីការនៅក្រសួងសាធារណការ និងដឹកជញ្ជូននៅ ថ្ងៃទី១០ ខែតុលា ឆ្នាំ២០១០៕
ព័ត៌មានលំអិតចោរលួចស្វាយ៖ កាលពីពេលថ្មីៗនេះសមត្ថកិច្ចបានឃាត់ខ្លួនបុរសម្នាក់ ក្រោយធ្វើសកម្មភាពលួចបេះផ្លែស្វាយ ដែលករណីនេះកេីតហេតុថ្ងៃសៅរ៍១ រោចខែភទ្របទ ឯកស័ក ព.ស ២៥៦៣ ត្រូវនឹងថ្ងៃទី១៤.០៩.២០១៩ វេលាម៉ោង២១:៣០នាទីនៅ ចំណុចចំការស្វាយឈ្មោះស៊ុនសុខណា ភូមិកោះតេជោ ឃុំគគីរធំ ស្រុកកៀនស្វាយ ខេត្តកណ្ដាល។ ជនសង្ស័យមានឈ្មោះ ទន់ វី ភេទប្រុសអាយុ២៧ឆ្នាំ ជនជាតិ ខ្មែរ មុខរបរមិនពិតប្រាកដ មានទីលំនៅភូមិ-ឃុំកើតហេតុ(ឃាត់ខ្លួន) វត្ថុតាងចាប់យកមានទូកឈើ ១គ្រឿងប្រវែង៧.៨០ម៉ែត្រទទឹង១ម៉ែត្រ (មានច្រវ៉ា១ ចែវ១) ,ផ្លែស្វាយចំនួន២៤ផ្លែ, ទូរស័ព្ទអិនចុចពិលពណ៌ខ្មៅ០១គ្រឿង ,ពិលពាក់ក្បាល១ និងសម្ភារៈប្រើប្រាស់គ្រឿងញៀនមួយចំនួន។
ជនរងគ្រោះបានទៅចាំឃ្លាំមើលចោរលួចបេះផ្លែស្វាយ។ ពេលនោះបានឃើញជនសង្ស័យជិះទូកដោយមានពិលពាក់នៅក្បាលសំដៅមកចំការស្វាយរបស់ខ្លួន រួចធ្វើសកម្មភាពបេះផ្លែស្វាយយកទៅដាក់លើទូក ពេលនោះជនរងគ្រោះបានស្ទុះទៅចាប់យកផ្លែស្វាយដាក់លើទូក រួចអុំទូកមកផ្ទះនិងបានទៅប្រាប់ឪពុកជនសង្ស័យថា “កូនពូឯងលួចបេះស្វាយខ្ញុំ” បន្ទាប់មកក៏បានទៅរាយការណ៍ប្រាប់លោកមេភូមិ ។ លុះដល់ថ្ងៃទីថ្ងៃ១៥.០៩.២០១៩ វេលាម៉ោង៧.០០នាទីជនរងគ្រោះបានមកប្តឹង កម្លាំងប៉ុស្តិ៍នគរបាលរដ្ឋបាលគគីរធំ។
ក្រោយទទួលបានពាក្យបណ្តឹងកម្លាំងប៉ុស្តិ៍បានចុះដល់កន្លែងកើតហេតុឃាត់ខ្លួនជនសង្ស័យរួមនិងវត្ថុតាងមកប៉ុស្តិដើម្បីសួរនាំ ។ នៅចំពោះមុខសមត្ថកិច្ចជនសង្ស័យបានឆ្លើយសារភាពថា ខ្លួនពិតជាបានធ្វើសកម្មភាពលួចបេះស្វាយរបស់ ជនរងគ្រោះប្រាកដមែន និងធ្លាប់ធ្វើសកម្មភាពលួចបេះផ្លែស្វាយប្រជាពលរដ្ឋក្នុងភូមិកោះតេជោប្រហែលជាង២០លើកមកហើយនិងធ្លាប់ប្រើប្រាស់គ្រឿងញៀនទៀតផង ។ ជនសង្ស័យរួមនិងវត្ថុតាងបានបញ្ជូនមកអធិការដ្ឋាន ដើម្បីបន្តចាត់ការតាមនីតិវិធី ៕
