លោក ស៊ុន ចាន់ថុល ជិះកង់ពិនិត្យគុណភាព និងលក្ខណៈបច្ចេកទេស ផ្លូវលេខជាតិលេខ៧ ពីត្បូងឃ្មុំ ទៅកំពង់ចាម

(ត្បូងឃ្មុំ-កំពង់ចាម)៖ នៅព្រឹកថ្ងៃទី២៤ ខែកក្កដា ឆ្នាំ២០១៩នេះ លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានដឹកនាំគណៈប្រតិភូក្រសួង អញ្ជើញចុះត្រួតពិនិត្យស្ថានភាពគុណភាព និងលក្ខណៈបច្ចេកទេស នៃការសាងសង់កំណាត់ផ្លូវជាតិលេខ៧ ដោយមានការចូលរួមពីតំណាងក្រុមហ៊ុនម៉ៅការសាងសង់ ក្រុមហ៊ុនទីប្រឹក្សាបច្ចេកទេស និងមន្ត្រីនៃមន្ទីរសាធារណការ និងដឹកជញ្ជូនខេត្តត្បូងឃ្មុំ។

ផ្លូវនេះមានប្រវែងសរុប ចំនួន៤៦០,៨៣០គីឡូម៉ែត្រ ជាប្រភេទបេតុងកៅស៊ូ (AC) ចាប់ពីស្គន់ ផ្លូវជាតិលេខ៦ (PK ៧៥+០០០) ដល់ត្រពាំងគ្រៀល (ព្រំដែនកម្ពុជា-ឡាវ) ក្នុងនោះប្រវែង ចំនួន២៧៥,៥៦០គីឡូម៉ែត្រ ត្រូវបានជួសជុលធ្វើឲ្យប្រសើរឡើងវិញ ចាប់ពីបង្គោលគីឡូម៉ែត្រលេខ១៣៦ ដោយប្រើប្រាស់ថវិកាអន្តរជាតិ សរុបចំនួន៦៩,៨២លានដុល្លារអាមេរិក។

ចាប់ពីបង្គោលគីឡូម៉ែត្រលេខ១៣៦-៣០០ ជាគម្រោងRAMP II ក្រោមហិរញ្ញប្បទានពីធនាគារពិភពលោក ក្នុងទឹកប្រាក់ចំនួន៣៦,៤៥លានដុល្លារអាមេរិក និងចាប់ពីបង្គោលគីឡូម៉ែត្រលេខ៣៣២,១២៥ -៤២៤,៦៩០ ជាជំនួយឥតសំណងរបស់រដ្ឋាភិបាលចិន ក្នុងទឹកប្រាក់ចំនួន៣៣,៣៧លានដុល្លារអាមេរិក។

ក្នុងដំណើរចុះពិនិត្យមើលស្ថានភាពគុណភាពផ្លូវនេះ ទេសរដ្ឋមន្ត្រី ស៊ុន ចាន់ថុល បានអញ្ជើញជិះកង់នៅខេត្តត្បូងឃ្មុំ ឋិតនៅបង្គោលគីឡូម៉ែត្រលេខ១៧៦-១៦៦ ក្នុងចម្ងាយផ្លូវ១០គីឡូម៉ែត្រ តាមបណ្តោយផ្លូវជាតិលេខ៧ ដើម្បីពិនិត្យគុណភាព និងស្ថានភាពផ្លូវ ឋិតក្រោមគម្រោងRAMP II ដែលកំពុងដំណើរការ ស្ថាបនាឡើងវិញ ដោយពង្រីកពី៧ម៉ែត្រ ទៅ១១ម៉ែត្រ ក្រាលបេតុងកៅស៊ូ១០ម៉ែត្រ។

គួរជម្រាបថា យុទ្ធនាការជិះកង់នេះ ធ្លាប់ត្រូវបានធ្វើបានជាច្រើនលើកមកហើយ ដើម្បីពិនិត្យឲ្យឃើញជាក់ស្តែង នូវផ្លូវមានជង្ហុកសំបុកមាន់ ផ្លូវមានទឹកដក់ ស្រកានាគ និងបញ្ហាផ្សេងៗ។ សកម្មភាពនេះ គឺជាគំរូសម្រាប់មន្ត្រីអនុវត្តគម្រោង និងថ្នាក់ដឹកនាំត្រូវមានការយកចិត្តទុកដាក់ខ្ពស់ លើការពិនិត្យគុណភាពផងដែរ៕

ហាមដាច់ខាតការយកអត្ថបទពីវេបសេយ www.baykdang.com ដោយគ្មានការអនុញ្ញាតិ។ បើលោកអ្នក ត្រូវការអត្ថបទ សូម inbox ទៅហ្វេសប៊ុកផេច [email protected]

ព័ត៌មានទាក់ទង៖

  • ព័ត៌មានថ្មីៗ