• ឥណ្ឌូណេស៊ី គ្រោងបញ្ជូនសំរាមប្រមាណ ២១០តោន ត្រឡប់ទៅកាន់អូស្រ្តាលីវិញ

    (ហ្សាការតា)៖ ឥណ្ឌូណេស៊ីនាថ្ងៃអង្គារនេះ បានឲ្យដឹងថា ខ្លួននឹងបញ្ជូនសំរាមជាង២១០តោន ត្រឡប់ទៅអូស្រ្តាលីវិញ ស្រប​ពេលដែលប្រទេសនៅអាស៊ីអាគ្នេយ៍ កំពុងព្យាយាមលុបលាងឈ្មោះជាកន្លែងចាក់សំរាមរបស់ប្រទេសដទៃ។ នេះបើតាមការ​ដកស្រង់ការផ្សាយចេញពីទីភ្នាក់ងារព័ត៌មានបារាំង AFP នៅល្ងាចថ្ងៃអង្គារ ទី០៩ ខែកក្កដា ឆ្នាំ២០១៩។

    បើតាមទីភ្នាក់ងារគយប្រចាំខេត្តជ្វាខាងកើត ក្រោយការត្រួតពិនិត្យកុងតឺណឺចំនួន៩ នៅឯទីក្រុង Surabaya ដែលគួរមានផ្ទុកតែកាកសំណល់ក្រដាសប៉ុណ្ណោះនោះ ក៏ស្រាប់តែរកឃើញមានផ្ទុកសារធាតុគីមីពុល និងសំរាមប្លាស្ទិកជាច្រើនទៀត។ ព្រោះតែ​ហេតុនេះ​​ក្រសួងបរិស្ថានឥណ្ឌូណេស៊ី បានផ្តល់អនុសាសន៍ឲ្យបញ្ជូនកុងតឺណឺផ្ទុកសំរាមទាំងអស់នេះត្រឡប់ទៅវិញ បន្ទាប់ពីពួក​វាត្រូវបានបញ្ជូនមកពីប្រទេសអូស្រ្តាលី។

    កាលពីសប្តាហ៍មុន ឥណ្ឌូណេស៊ីទើបតែបានប្រកាសពីគម្រោងបញ្ជូនសំរាមចំនួន៤៩កុងតឺណឺ ត្រឡប់ទៅកាន់ប្រទេសបារាំង និងប្រទេស​អភិវឌ្ឍន៍ឯទៀតៗ។ ចំណែកកាលពីខែឧសភា ម៉ាឡេស៊ី ក៏បានប្រកាសដែរថា ខ្លួននឹងបញ្ជូនកាក​សំណល់​ប្លាស្ទិក​ទម្ងន់​៤៥០តោន ត្រឡប់ទៅកាន់ប្រទេសដែលជាភពដើមវិញ រួមមានអូស្រ្តាលី បង់ក្លាដែស កាណាដា ចិន ជប៉ុន អារ៉ាប៊ីសាអូឌីត និង​សហរដ្ឋអាមេរិក។ រីឯនៅចុងខែមិថុនា កាណាដាក៏ទើបទទួលបានសំរាមជិតជាង៦០កុងតឺណឺរបស់ខ្លួនវិញ ក្រោយហ្វីលីពីន​បានបង្ខំឲ្យដឹកយកទៅវិញជាបន្ទាន់៕

    ហាមដាច់ខាតការយកអត្ថបទពីវេបសេយ www.baykdang.com ដោយគ្មានការអនុញ្ញាតិ។ បើលោកអ្នក ត្រូវការអត្ថបទ សូម inbox ទៅហ្វេសប៊ុកផេច [email protected]

    ព័ត៌មានទាក់ទង៖

  • ព័ត៌មានថ្មីៗ