• ស៊ុន ស៊ីដាវីន សុខចិត្ត​ចោល​ការ​ងារ​នៅ​អាមេរិក​ វិល​មកនៅ​ស្រុក​ខ្មែរ​វិញ​ព្រោះ​ចង់​ជួយ​សង្គម​​​​ជាតិ

    ភ្នំពេញៈ ថ្មីៗ​នេះ​តារាចម្រៀង​ខ្មែរ​ ដែលបាន​ទៅ​​រស់នៅ​លើ​ទឹកដី​អាមេរិក​ ប្រមាណ​ ២០ ឆ្នាំ និង​មាន​​​​​តំណែង​ជា​មន្ត្រី​សង្គមកិច្ច​​ក្នុង​រដ្ឋ​ខេនសាស ​អ្នកនាង ស៊ុន ស៊ីដាវីន ​​ប្រិយមិត្ត​ខ្មែរ​ធ្លាប់​​ស្គាល់​​​តាមរយៈ​​​ចម្រៀង​ជា​មួយ​បុរស​អាមេរិក ច្រៀង​​​ខ្មែរ​លោក ឆាដ ឃើរប៊ី ក្នុង​ចម្រៀង​លំនាំ​​​ដើម «​ឆ្នាំមុន​» នោះ ស្រាប់​តែមាន​វត្តមាន​​នៅ​ស្រុក​ខ្មែរ​វិញ តាម​ការ​សន្យាថា​នឹង​មកចូលរួមជួយ​សង្គម​ជាតិ​តាមជំនាញ​។​

    អ្នកនាង ស៊ុន ស៊ីដាវីន តារាចម្រៀង​ខ្មែរ​មាន​ប្រជាប្រិយ​ភាព​នៅឯ​នាយសមុទ្រ​ ជា​ស្រ្តី​ខ្មែរ​មាន​កំណើត​នៅ​ស្រុក​កំពង់បាយ ខេត្ត​កំពត បាន​ទៅ​រស់នៅ​លើ​ទឹកដី​ទីក្រុង​វិឈីតា រដ្ឋ​ខេនសាស សហ​រដ្ឋ​​អាមេរិក ជា​មួយ​អ្នកម្តាយ​ជា​ទីស្រឡាញ់ និង​ក្រុម​គ្រួសារ​អស់​ពេលប្រហែល ​២០ ឆ្នាំ​ ​មក​​​​ហើយ និង​មាន​កូន​ប្រុស​​​ឈ្មោះ សាយរឺស ម៉ាសៀស ស៊ុន (Cyrus Macias Sun) វ័យ​​​​ ១០ ​ឆ្នាំ​ ​ជា​ចំណង​ស្នេហ៍​​​ជាង ១០ ​ឆ្នាំ​​នឹង​​​ស្វាមី​​អាមេរិ​ក​លោក ដានី​ញ៉ែល ម៉ា​សៀស (Daniel Macias) ជា​មេធាវី​​ក្រុមហ៊ុន​​ឯក​ជន។

    ខណៈ​​ពេល​នេះ​​​តារា​ស្រី​សម្បុរ​ស្រអែម ស្រស់​សោភា​ ជា​ដៃគូ​ឆ្លើយឆ្លង​ដ៏ស៊ីចង្វាក់​​នឹង​លោក ឆាដ ឃើរប៊ី ក្នុង​ប​ទ​លំនាំ​ដើម ​«ឆ្នាំ​មុន»​នោះ​ កំពុង​តែ​រៀបចំ​​ការ​រស់​នៅ​សាជាថ្មី​ឡើង​វិញ​ នៅ​​ទឹក​ដីស្រុក​​កំណើត​​ខ្លួននៅ​​ឯក្រុង​កំពត ខេត្ត​កំពត​ ជាមួយ​កូន​ប្រុស និង​ស្វាមី​ ហើយ​ក៏​អាច​​​​ទទួល​ការ​ងារ​សិល្បៈ ដែល​​ជាចំណូល​ចិត្ត​បន្ទាប់​តាមពេល​​ទំនេរ​បណ្តើរៗ​បាន​ ​​មុន​​ការ​​ងារ​​ស្នូលតាម​ជំនាញ​ផ្នែក​សង្គម​កិច្ច​​​។​

    អ្នកនាង ស៊ុន ស៊ីដាវីន​ ​ក៏​បាន​បញ្ជាក់​ប្រាប់​​ថា​៖ «​​​​ការ​ងារ​តាមជំនាញ​ដែល​បាន​រៀន​ចប់​​នោះ នាងខ្ញុំ​នៅ​ពុំ​​​ទាន់​បាន​ធ្វើ​នៅឡើយ​ទេ ដោយសារ​តែ​​ខ្ញុំ​​ទើប​តែ​មក​ដល់ស្រុក​ខ្មែរ​​ ​ហើយ​ត្រូវ​ការ​ពេល​​សម​រម្យ​មួយ ​ក្នុង​ការ​រៀបចំ​​សង្គម​គ្រួសារ​​ឲ្យ​បាន​ស្រួល​បួល​​សិន គឺថា​ខ្ញុំ​ត្រូវ​​សង់​ផ្ទះ​នៅ​​​ស្រុក​កំណើត​ ក្បែរ​ក្រុង​កំពត​ និង​រក​សាលា​ឲ្យ​កូន​រៀន​ជាដើម»​​។

    តែ​តារាចម្រៀងស្រី​​​ទើប​​​តែ​និពន្ធ​បទចម្រៀង​ថ្មី​ប្រភេទ​អូរីជីណល​គឺ​បទ «​មួយ​​នាទី​ក៏​ជា​និស្ស័យ​»​ ​បាន​បង្ហោះ​តាម​យូ​ធូប​ កាល​ពី​​ថ្ងៃទី​ ១១ ខែ​​កុម្ភៈ​ ឆ្នាំ​២០១៩ កន្លងមក​​​​​ឲ្យ​ដឹង​ពី​ឱកាស​​អាច​ចូល​រួម​ក្នុង​វិស័យ​​សិល្បៈ​ចម្រៀង​ ដែល​ជា​ចំណូល​​ចិត្ត​​ខ្លួន​​ដែរ​នោះ បន្ត​ថា៖ «តែ​សម្រាប់​សិល្បៈ​វិញ នាងខ្ញុំ​ទទួល​បាន​តាម​ពេល​​វេលា​ទំនេរ​របស់​ខ្ញុំ​ ដែល​អាច​ទៅ​បាន​ដែរ​ដូចជា​មិន​ចោទ​ជា​បញ្ហា​ទេ​ ប្រការ​សំខាន់​នោះ​ប្រសិន​​​មាន​​គេ​ទំនាក់​ទំនង​មក​ខ្ញុំ​ ហើយ​ចំ​ពេល​​ខ្ញុំ​ទំនេរ​គឺ​ខ្ញុំ​នឹង​ទៅ​ចូល​រួម​»។​

    សម្រាប់​វិស័យ​ចម្រៀង ​អ្នកនាង ស៊ុន ស៊ីដាវីន ​ចូលចិត្ត​ច្រៀង​បទ​​ពី​សម័យដើម​ដូចជា​បទ​របស់​អ្នកស្រី រស់ សេរីសុទ្ធា ពៅ វណ្ណារី ហួយ មាស និង លោក ស៊ិន ស៊ីសាមុត ជាដើម​ រីឯ​ចម្រៀង​សម័យ​វិញ​​ ចូល​ចិត្ត​​បទ​របស់​កញ្ញា មាស សុខសោភា និង​បទ​ខ្មែរ​សុរិន្ទ​របស់​អ្នកនាង ចេន សាយចៃ និង​លោក សុង សែង ខណៈ​បទ​បរទេស​​មាន​បទ​ចង្វាក់​ខាន់​ទ្រី​របស់​តារា​ចម្រៀង Carrie Underwood និង​​តារាចម្រៀង​ខ្មែរ​​អាមេរិក​លោក Jay Chan ផង​ដែរ៕​

    ហាមដាច់ខាតការយកអត្ថបទពីវេបសេយ www.baykdang.com ដោយគ្មានការអនុញ្ញាតិ។ បើលោកអ្នក ត្រូវការអត្ថបទ សូម inbox ទៅហ្វេសប៊ុកផេច [email protected]

    ព័ត៌មានទាក់ទង៖

  • ព័ត៌មានថ្មីៗ