ភ្នំពេញៈ ខណៈពេលបានទស្សនាការផ្សាយបន្តផ្តាល់ស្ទើរតែគ្រប់កម្មវិធីរបស់ទូរទស្សន៍ហង្សមាស ប្រិយមិត្តក៏តែងតែបានឃើញវត្តមានរបស់ពិធីការិនីឆ្នើម និងសម្បូរទេពកោសល្យក្នុងការប្រើពាក្យពេចន៍សម្តីមិនសូវជាន់គ្នា អ្នកនាង ចាន់ កែវនិមល ដែលជាដៃគូដ៏សមគ្នាបំផុតជាមួយលោក ជា វិបុល ក្នុងពិភពសិល្បៈនៃពិធីការ។
តែភាពល្បីល្បាញសព្វថ្ងៃរបស់ អ្នកនាង ក៏បានលះបង់នូវការងារជំនាញមួយ ដែលបានតស៊ូរៀនសូត្រច្រើនឆ្នាំដែរ ខណៈអ្នកនាងក៏នឹករឮកអាជីពចាស់នោះផងដែរ គឺអ្នកនាងបានបង្ខំចិត្តទុកចោលការងារជាសាស្ត្រាចារ្យផ្នែកឌីហ្សាញ នៅសាកលវិទ្យាល័យមួយ ក្រោយពីពេលស្ទុះចូលទៅចាប់ការងារសិល្បៈសព្វថ្ងៃជាពិធីការិនីនោះ រហូតចោលតួនាទីជាគ្រូបង្រៀនឌីហ្សាញលែងបាន។
ពិធីការិនីឆ្នើមនៅហង្សមាស អ្នកនាង ចាន់ កែវនិមល បង្ហើបឲ្យដឹងថា «ខ្ញុំពិតជាធ្លាប់ធ្វើជាគ្រូបង្រៀននិស្សិតនៅសាកលវិទ្យាល័យមែន ដោយមានជំនាញឌីហ្សាញប្លង់ បានប្រមាណជា២ ទៅ ៣ ឆ្នាំ ដែរ។ តែពេលនេះ បើចង់បកក្រោយ គឺមិនអាចដូចដើមបាននោះទេ។ យើងត្រូវការរៀនរំឮកវាឡើងវិញច្រើន ហើយជំនាញនេះ គេអាប់ដេតជាប្រចាំទៀតផង គឺរឹតតែលំបាកសម្រាប់ខ្ញុំដែរមើលទៅ ដោយមេរៀនចាស់ពីមុន ប្រហែលជាដើរមិនទាន់នោះឡើយ។ ចំណែកឯនិស្សិតយើងក៏ខ្លាំងជាងមុនដែរ។ ដូច្នេះ មានតែទទួលយកអ្វី ដែលជាការពិតនាពេលបច្ចុប្បន្ន ហើយខំធ្វើការឱ្យបានល្អតែប៉ុណ្ណោះ»។
គួរកត់សម្គាល់ថា អ្នកនាង ចាន់ កែវនិមល គឺជាពិធីការិនីមួយរូប ដែលមានភាពលេចធ្លោជាងគេនៅប៉ុស្តិ៍ទូរទស្សន៍ និងសម្បូរវត្តមានស្ទើរតែគ្រប់កម្មវិធីកម្សាន្តនានារបស់ប៉ុស្តិ៍ ទូរទស្សន៍ហង្សមាស ដូចជាកម្មវិធី Cambodian Idol គ្រប់រដូវកាល កម្មវិធី The Voice Kids Cambodia ទាំង ២ រដូវកាល ឬកម្មវិធីប្រគំតន្ត្រីផ្សាយផ្ទាល់នៅតាមខេត្តនានារៀងរាល់ចុង សប្តាហ៍ ជាមួយនឹងពិធីករ ដែលស៊ីចង្វាក់គ្នាគឺលោក ជា វិបុល និងជាពិធីការិនីមួយរូបដែលមានទេពកោសល្យចេះប្រើសំនួនពាក្យពេចន៍ ខ្មែរមានលក្ខណៈល្អប្រសើរជាងគេនៅក្នុងអាជីពជាអ្នកប្រើដើមទុនសំឡេង អត្ថាធិប្បាយបង្ហើរជាសូរសៀង ពាក្យសម្តីដ៏សមសួនតាមបរិយាកាសនៃកម្មវិធីតែម្តង បើប្រៀបធៀបជាមួយនឹងចំណោមអ្នកដែលបានប្រកបអាជីពជាពិធីការិនីនៃ រលកក្រោយៗ។ លើសពីនេះពិធីការិនី ចាន់ កែវនិមល ផ្តើមល្បីខ្លាំងគឺពេលចាប់តាំងពីប៉ុស្តិ៍ ទូរទស្សន៍ហង្សមាសកកើតតែម្តង៕
