ភ្នំពេញៈ ក្រោយពីតារាស្រី ហង្ស ម៉ារីនី បានរៀបការជាមួយនឹងបុរសជាមន្រ្ដីរាជការម្នាក់ ដែលពេលនេះទទួលបានចំណងដៃកូនប្រុសម្នាក់ ជាចំណងដៃមក នាងបានបង្ហើបថា ស្វាមី នឹងក្រុមគ្រួសារទាំងមូល តែងតែលើកទឹកចិត្ត និងគាំទ្រឲ្យ នាងធ្វើកិច្ចការសប្បុរសធម៌ ហើយកន្លងមក នាងធ្លាប់ធ្វើការងារនេះជាច្រើនខេត្តមកហើយ ប្ដេជ្ញាថា នឹងធ្វើតទៅមុខទៀត ដោយគ្មានដែនកំណត់។
ប្រមូលផ្តុំដោយគ្រឿងបរិភោគ និងឧបភោគនានាមានដូចជា មី ទឹកត្រី ទឹកស៊ីអ៊ីវ ថ្នាំពេទ្យ និងសម្ភារៈមួយចំនួនទៀត ត្រូវបានតារាស្រី ហង្ស ម៉ារីនី និងគ្រួសារ បានយកទៅចែកជូនពលរដ្ឋនៅស្រុកកំណើតរបស់នាង នាងផ្ទាល់ នៅភូមិស្វាយទង ឃុំក្វាវ ស្រុករំរោង ខេត្តតាកែវ។
នេះគឺការបង្វែរប្រារព្ធពិធីខួបកំណើតរបស់តារាស្រីនៅឆ្នាំនេះ គឺថ្ងៃខួបវ័យ ២៧ឆ្នាំ មកធ្វើទានដល់ចាស់ជរា និងក្មេងកំព្រា មានចំនួនប្រមាណជា ១០០ នាក់ ខណៈតារាសម្ដែងតូចច្រឡឹង ហង្ស ម៉ារីនី បានយកអំណោយទៅចែកជូនដល់ចាស់ជរា គ្មានទីពឹង ចំនួន ៧០ នាក់ និងកំព្រាជាង៣០ នាក់ កាលពីព្រឹកថ្ងៃទី១៤ ខែឧសភា ឆ្នាំ២០១៩ កន្លងមក ដែលចំថ្ងៃខួបកំណើតនាង។
អ្នកនាង ហង្ស ម៉ារីនី បានឲ្យដឹងថា ៖ «នេះមិនមែនជាលើកទីមួយឡើយ ដែលនាងបានយកថ្ងៃខួបកំណើត មកចែកអំណោយមួយចំនួន ដល់ពលរដ្ឋដែលខ្វះខាតនោះ ពោលគឺជាច្រើនលើកច្រើនសារមកហើយ ព្រោះនាងចង់យកថ្ងៃពិសេសនេះ ផ្ដល់ក្ដីស្រលាញ់ដល់អ្នកដែលខ្វះខាត ឲ្យពួកគាត់បានសប្បាយចិត្តផងដែរ។ ចំពោះថវិការដែលទិញសម្ភារៈវិញ នាងបានមកពីការលក់សៀវភៅ និងហាងលក់គ្រឿងសម្អាង Cosmetic របស់នាង ដែលប្រាក់ចំណេញមួយចំនួនមកធ្វើកិច្ចការសង្គម»៕
