ភ្នំពេញៈ ចាស់ពានកម្មវិធីចម្រៀងដ៏ធំ The Melody មាស មុនីរាជ ត្រូវគេធីបចោលរហូតឆ្អែតពីសិល្បៈ នេះបើតាម លោកនិយាយថា បើយើងមិនផ្គាប់ចិត្តគេទេ យើងមិនអាចល្បីបានឡើយ។ កាលពីថ្មីៗនេះតារាចម្រៀងប្រុសលោក មាស មុនីរាជ បានឲ្យដឹងថា នៅពេលនេះ បើនិយាយពីសិល្បៈលោកដូចតារាថ្មីមិនដឹងទៅពឹងពាក់អ្នកណានោះឡើយ ទោះបីជាខ្លួនជាប់ពានឆ្នើមក៏ដោយ ព្រោះគ្មានការជួយរកទីផ្សារឲ្យនោះឡើយ។
ប្រិយមិត្តដែលនិយមតាមដានកម្មវិធីប្រឡងចម្រៀងធំៗ ពិតជាមិនទាន់ភ្លេចឈ្មោះអតីតបេក្ខជន មាស មុនីរាជ ឡើយ ព្រោះលោកមានសមត្ថភាព និងទឹកដមសំឡេងល្អច្រៀងពិរោះ។ ដោយសារការព្យាយាមរហូតក្លាយជាម្ចាស់ពាន ព្រោះបានសំឡេងបោះឆ្នោតពីមហាជនធ្វើឲ្យតារារះថ្មីរូបនេះរំពឹងល្បីរន្ទឺ តែជាចុងក្រោយស្ទើរដើរចេញ នៅពេលពើបប្រទះភាពចុកចាប់ជាច្រើនគ្មានទីផ្សារសិល្បៈ។
គួររំឮកដែរថា លោក មាស មុនីរាជ ក៏ជាអតីតបេក្ខជនប្រឡងចម្រៀងក្នុងកម្មវិធីខេមបូឌាអាយឌល រដូវកាលទី១ ចូលដល់វគ្គផ្សាយបន្តផ្ទាល់សប្តាហ៍ទី៧ ត្រូវចាកចេញដោយជំនាន់ទី១ នាពេលនោះត្រូបប៉ះបេក្ខជនវគ្គ Live Show ខ្លាំងៗជាច្រើនមានដូចជាលោក នី រតនា លោក ម៉ៅ ហាជី លោក អៀម វន្នី លោក សៅ ឧត្តម និងកញ្ញា សុវត្ថិឌី ធារិកា ជាដើម។
ដោយមិនអស់ចិត្តបាត់មុខមួយរយៈលោកមកប្រឡងចម្រៀងថ្មីមួយទៀត នៅទូរទស្សន៍បាយ័ននៃកម្មវិធី «The Melody» តស៊ូដល់ដំណាក់កាលចុងក្រោយ គឺជាទីបំផុតលោក មាស មុនីរាជ រីកមុខមាត់ក្លាយជាម្ចាស់ពានសមតាមសេចក្តីប្រាថ្នា៕
