ភ្នំពេញៈ ការប្រកួតប្រជែងរ៉ូបូត រយៈពេលមួយព្រឹកពេញ ដែលមានក្រុមចំនួនប្រាំបួន ចូលរួមប្រជែងមកពីវិទ្យាស្ថាន និងសកលវិទ្យា ចំនួន៥ រួមមាន៖ សកលវិទ្យាល័យភូមិន្ទភ្នំពេញ (Royal university of Phnom Penh) សកលវិទ្យាល័យជាតិគ្រប់គ្រង (Nation University of management) វិទ្យាស្ថានបច្ចេកវិទ្យាកម្ពុជា(Institute of Technology of Cambodia) វិទ្យាស្ថានជាតិពហុបច្ចេកទេសកម្ពុជា(National Polytechnic Institute of Cambodia) និងវិទ្យាស្ថានពហុបច្ចេកទេសព្រះកុសុម (Preah Kossomak Polytechnic Institute) ។
ជាមួយនឹងសំឡេងហ៊ោកញ្ជ្រៀវពីក្រុមអ្នកគាំទ្រ ការប្រកួតប្រជែងរ៉ូបូតថ្នាក់ជាតិលើកទី៦ ឆ្នាំ២០១៩ ធ្វើនៅថ្ងៃទី ២៧ ខែមេសា នៅសាលដំបូលទូកនៃសកលវិទ្យាល័យភូមិន្ទភ្នំពេញ ដោយមានអ្នកចូលរួមទស្សនាប្រមាណជាងមួយពាន់នាក់។ ការប្រកួតរកឃើញម្ចាស់ជើងឯកគឺ ក្រុម វិទ្យាស្ថានជាតិពហុបច្ចេកទេសកម្ពុជា (NPIC01) បានចំណាត់ថ្នាក់លេខ១។
ជ័យលាភីលេខ២ ដោយបានទៅក្រុម NPIC02 ខណៈជ័យលាភីផ្នែកវិស្វកម្ម បានទៅលើក្រុមPPI01និង ជ័យលាភីផ្នែកគំនិតបានទៅលើក្រុម ITC01។ ចំណែកជ័យលាភីផ្នែករចនា បានទៅលើក្រុម ITC02 និង ជ័យលាភីផ្នែកប្រជាប្រិយភាព បានទៅលើក្រុម PPI01 ហើយជ័យលាភីពានរង្វាន់តូយ៉ូតាបានទៅលើក្រុម RUPP02។
ក្រោយពីទទួលជ័យលាភីលេខ១ ក្រុម NPIC01 នឹងក្លាយជាក្រុមតំណាងកម្ពុជា ត្រៀមចេញទៅប្រកួតបន្ត នៅក្នុងការប្រកួតរ៉ូបូតជាលក្ខណៈអន្តរជាតិ ABU Robocon 2019 នៅទីក្រុងអ៊ូឡាបាតាន ប្រទេសម៉ុងហ្គោលី នាពេលខាងមុខ។
អ្នករៀបចំកម្មវិធីប្រកួតប្រជែងរ៉ូបូតថ្នាក់ជាតិនេះ លោក ប៉ាង ចំណាន បានបញ្ជាក់ថាពីគោលបំណងក្នុងការរៀបចំកម្មវិធីនេះធ្វើឡើង ដើម្បីលើកកម្ពស់វិស័យរ៉ូបូតនៅកម្ពុជា ដែលដើរតួជាប្រព័ន្ធស្វ័យប្រតិបត្តិកម្មជំនួយសង្វាក់ការងារដល់វិស័យកសិកម្ម ឧស្សាហកម្ម និងវិស័យសុខាភិបាល។ ការប្រកួតក៏ជាឱកាសមួយ សម្រាប់សិស្សនិស្សិត បញ្ចេញសមត្ថភាព បង្កើតអ្វីដែលថ្មី ផ្លាស់ប្តូរបទពិសោធទៅវិញទៅមកផងដែរ។
រ៉ូបូតរបស់ក្រុមម្ចាស់ជើងឯកនេះ មានចំនួនពីរ គឺរ៉ូបូត Manual (ដើរដោយតេលេបញ្ជា) និង រ៉ូបូត Auto (ដើរដោយប្រព័ន្ធស្វ័យប្រវត្តិ) ដែលចំណាយថវិកាប្រមាណជិតប្រាំមួយពាន់ដុល្លារ និងរយៈពេលជាង ៤ ខែ៕
