ក្រុងសំរោងៈ ក្រុមអ្នកអភិរក្សឧបករណ៍ភ្លេងបុរាណមួយប្រភេទ ដែលជិតបាត់ ឬនិយាយបានថានៅសល់តែមួយក្នុងប្រទេសកម្ពុជាសព្វថ្ងៃ មកពីខេត្តឧត្តរមានជ័យ របស់លោកគ្រូ ម៉ុន ហៃ នឹងមកធ្វើបទបង្ហាញពីឧបករណ៍ភ្លេងគែន នឹងធ្វើនៅឆាកសារមន្ទីរជាតិ ក្នុងរាជធានីភ្នំពេញ នាថ្ងៃទី៥ ខែឧសភា ឆ្នាំ២០១៩ ខាងមុខ ចាប់ពីម៉ោង ៤ និង ៣០ នាទី ដល់ម៉ោង ៦ ល្ងាច ក្រោមការរៀបចំដោយក្រុមរយន្តតន្រ្តីទិព្វ និងអង្គការសិល្បៈខ្មែរអមតៈ។
បច្ចុប្បន្នលោកគ្រូ ម៉ុន ហៃ វ័យ ៦៤ ឆ្នាំ គឺជាអ្នកបន្តថែរក្សាឧបករណ៍ភ្លេងកេរតំណែលពីដូនតាប្រចាំនៅភូមិក្រសាំង ឃុំបុស្បូវ ក្រុងសំរោង ខេត្តឧត្តរមានជ័យ តែមួយគត់ ដែលបានទៅរៀនលេងឧបករណ៍គែន តាំងពីខ្លួនមានវ័យ ២៥ ឆ្នាំ មក និងមានឪពុកជាខ្មែរសុរិន្ទ ម្ដាយជាតិខ្មែរ។
លោកគ្រូ ម៉ុន ហៃ ដែលកំពុងតែបណ្តុះចៅស្រី ២ នាក់ ដែលម្នាក់វ័យ ១៨ ឆ្នាំ និងម្នាក់ទៀត វ័យ ១៦ ឆ្នាំ ឲ្យរៀនលេងឧបករណ៍គែនបន្តពីគាត់ ខណៈលោកគ្រូក៏មានកូន ៥ នាក់ ដែរ គឺសុទ្ធតែគ្មាននិស្ស័យខាងសិល្បៈប្រភេទនេះឡើយ ហើយលោកក៏មានបំណងចង់បោះបង់ចោលវាទៀតផង។
លោកគ្រូបញ្ជាក់ឲ្យដឹងពីឆន្ទៈបន្តការអភិរក្សវង់ភ្លេងគែននេះថា៖ «ដោយសារតែមានក្រុមរថយន្តតន្រ្តីទិព្វ និងអង្គការសិល្បៈខ្មែរអមតៈ សំណូមបន្តការអភិរក្ស និងជួយសម្របសម្រួលឲ្យខ្ញុំមានការបង្ហាត់ឧបរកណ៍នេះ បន្តដល់ក្មេងជំនាន់ក្រោយនាពេល ៥-៦ ឆ្នាំ ចុងក្រោយមកនោះ ទើបខ្ញុំមានការយកចិត្តទុកដាក់លើវាឡើងវិញ។ ហើយបច្ចុប្បន្ននេះ ខ្ញុំក៏មានក្រុមទម្រង់សិល្បៈបុរាណពីរវង់គឺឧបករណ៍ភ្លេងគែន និងភ្លេងថន ផងដែរ»។ លោកគ្រូ ម៉ុន ហៃ បន្តថា៖ « ការធ្វើបទបង្ហាញនេះ គឺចង់ផ្សព្វផ្សាយពីទម្រង់សិល្បៈតន្រ្តីបុរាណមួយនេះ ឲ្យកូនចៅខ្មែរជំនាន់ក្រោយបានស្គាល់។
វង់ភ្លេងគែន ឬ ឧបករណ៍ភ្លេងគែន គេច្រើនប្រទះឃើញមានការប្រគំលេងនៅតាមពិធីច្រើនយ៉ាងមានដូចជាពិធីបុណ្យសព បុណ្យសែនអ្នកតា ពិធីបញ្ជាន់អារក្ស បច្ច័យបួន បុណ្យដារលាន ឬបុណ្យចូលឆ្នាំថ្មី ឬបុណ្យទាននានាជាដើម។
លោកគ្រូ ម៉ុន ហៃ បានបញ្ជាក់បន្ថែមថា៖ «បើតាមការចំណាំតរៀងមកនោះ គឺគេលេងបានទាំងក្នុងពិធីមានភាពបែបសោកសៅផង និងបែបសប្បាយផង តែលើកលែងពិធីមង្គលការមួយ ដែលគេមិនយកមកប្រគំលេងនោះឡើយ។ កាលពីមុនវង់ភ្លេងគែន នេះមានការគាំទ្រ និងពេញនិយមច្រើនពីសំណាក់អ្នកស្រុកអ្នកភូមិទាំងចាស់ទាំងក្មេង ប្រៀបដូចជាទម្រង់សិល្បៈតន្រ្តីបុរាណនានានៅតំបន់ខេត្តផ្សេងៗដូចជាចាប៉ី ឬអាយ៉ៃ ផងដែរ។ តែឥលូវនេះ ដោយសារវត្តមានតន្រ្តីសម័យ និងឧបករណ៍ភ្លេងបាស់ បានធ្វើឲ្យការតន្រ្តីគែន មានការថយប្រជាប្រិយភាពខ្លាំង សឹងតែគ្មានអ្នកស្គាល់ ជាពិសេសក្មេងជំនាន់ក្រោយតែម្តង។ ដោយឡែកការចូលរួមមើលការបង្ហាញឧបករណ៍គែននេះ ក៏តម្រូវឲ្យភ្ញៀវជាវសំបុត្រទស្សនាផងដែរ ខណៈសំបុត្រ ១ តម្លៃ ៥០០០ រៀល៕
