ភ្នំពេញៈ នាពេលថ្មីៗនេះ តារាសម្តែងស្រីរាងតូចច្រឡឹង ដៃជើងស្រឡូន មានរូបសម្ផស្សបែបធម្មជាតិ កញ្ញា វណ្ណៈ បូរមី ស្រាប់តែព្រលយដំណឹងផ្ទាល់ខ្លួន ហាក់ចង់ប្រាប់ថា កំពុងតែមានម្ចាស់បេះដូង បង្កការភ្ញាក់ផ្អើលដល់មហាជនសាជាថ្មីនាឱកាសប្រារព្ធចូលឆ្នាំថ្មីប្រពៃណីជាតិខ្មែរកាន់ខិតចូលមកដល់។
តែតារាសម្តែងស្រីទើបមានវ័យឈានចូល ២១ ឆ្នាំ ប៉ឹមៗ ដែលអតីតជាបេក្ខនារីប្រកួតកម្មវិធី Freshie Girls & Boys កាលពីឆ្នាំ ២០១៦ ត្រឹមបេក្ខនារី ៦ រូបចុងក្រោយ កញ្ញា វណ្ណៈ បូរមី ក៏បានបងហើរសារទំនងជាចង់ប្រាប់ថា នេះគឺជារដូវកាលនៃការលេងសើចនៅក្នុងកាលៈទេសៈនៃថ្ងៃ April Fool’s Day នោះដែរហើយមើលទៅ។ មួយរំពេចនោះ ស្រីស្រស់ចូលចិត្តសម្តែងកុនបែបជារឿងស៊ើបអង្កេតនោះ បានឆ្លើយបដិសេធភ្លាមៗថា៖ «អត់មានទេបង!នាងខ្ញុំមិនទាន់ដំណឹងល្អ ឬមានម្ចាស់ចិត្តម្ចាស់បេះដូងអ្វីនោះទេ!តាមពិតទៅការប្តូរ Status រឿងផ្ទាល់ខ្លួននាងខ្ញុំនោះ គ្រាន់តែដូរលេងទេតើបង»។
មុននេះបន្តិច ប្រិយមិត្តជាគាំទ្រតារាសម្តែងស្រី មានរាងតូចច្រឡឹង ដៃជើងស្រឡូន ជាពន្លកសិល្បៈថ្មី ទើបតែប្រឡូកវិស័យសិល្បៈសម្តែងត្រឹមជាង ២ ឆ្នាំស្រីស្រស់សោភា កញ្ញា វណ្ណៈ បូរមី សង្កេតឃើញថា នាងហាក់មានទីផ្សារថតកុនស្ងាត់គួរឲ្យមានការងឿងឆ្ងល់។
តែតារាសម្តែងស្រីរូបនេះក៏ប្រាប់ពីមូលហេតុ ដែលរាងរយាលក្នុងទីផ្សារថតកុនដែរថា៖ «ក្រោយពីបានថតកុនភាគប៉ុន្មានចុងក្រោយចប់មក គឺនាងខ្ញុំមិនទាន់បានទទួលថតកុនអ្វីថ្មីនោះឡើយ ដោយសារនាងខ្ញុំមិនទាន់ផុតកុងត្រានៃគម្រោងចាស់ គឺនៅសល់ពេលប្រមាណ ៣-៤ ខែទៀតឯណោះ ទើបអាចហ៊ានទទួលគម្រោងថ្មី។ តែទោះជាយ៉ាងណាក្តី ក្រៅពីការងារសិល្បៈថតកុននោះ ក៏មានភាពមមាញឹកនឹងការងារថតស្ប៉តពាណិជ្ជកម្មនានាជាហូរហែផងដែរ»៕ Piseth – Baykdang
