នាខែមិថុនាខាងមុខ ព្រឹត្តិការណ៍វគ្គជម្រុះបាល់ទាត់ជើងឯកពិភពលោកឆ្នាំ២០២២ (FIFA World Cup 2022) នឹងចាប់ផ្តើមដំណើរការប្រកួតហើយដែលត្រូវបានបែងចែកជា៦តំបន់គឺ តំបន់អាស៊ី (AFC) តំបន់អាហ្វ្រិក (CAF) តំបន់អាមេរិកខាងជើង កណ្ដាល និងការីប៊ៀន (CONCACAF) តំបន់អាមេរិកខាងត្បូង (CONMEBOL) តំបន់អូស្យានី (OFC) និង តំបន់អឺរ៉ុប (UEFA)។
តំបន់អាស៊ីមានប្រទេសចំនួន១២ដែលមានចំណាត់ថ្នាក់ពិភពលោក FIFA Ranking ទាប់ ចាប់ពីលេខ ៣៥-៤៦ (គិតតំបន់អាស៊ី) ត្រូវប្រកួតជម្រុះជុំទី១ដើម្បីរក៦ក្រុមឡើងទៅជុំទី២។
ប្រទេស៦ដែលស្ថិតនៅកម្រិតលើគឺ Seeded
1. ម៉ាឡេស៊ី
2. កម្ពុជា
3. ម៉ាកាវ
4. ឡាវ
5. ប៊ូតាន់ និង
6. ម៉ុងហ្គោលី
ប្រទេស៦ទៀតស្ថិតនៅកម្រិតក្រោមគឺ Unseeded
1. បង់ក្លាដេស
2. កោះ Guam
3. ប្រ៊ុយណេ
4. ទីម័រខាងកើត
5. ប៉ាគីស្ថាន និង
6. ស្រីលង្កា
ការចាប់ឆ្នោតដោយប្រទេសកម្រិត Seeded ទៅជួបប្រទេសកម្រិត Unseeded ដូច្នេះមានន័យថា មានប្រទេស១ក្នុងចំណោមប្រទេស បង់ក្លាដេស កោះGuam ប៊្រុយណេ ទីម័រខាងកើត ប៉ាគីស្ថាន និងស្រីលង្កា ត្រូវជួបក្រុមជម្រើសជាតិកម្ពុជា។
ការចាប់ឆ្នោតនឹងធ្វើនៅថ្ងៃទី១៧ ខែមេសា នៅទីស្នាក់ការរបស់សហព័ន្ធកីឡាបាល់ទាត់ទ្វីបអាស៊ី ( AFC) ក្នុងទីក្រុងកូឡាឡាំពួរ ប្រទេសម៉ាឡេស៊ី។ ការប្រកួតជើងទី១ នឹងធ្វើនៅថ្ងៃទី៦ ខែមិថុនា ឆ្នាំ២០១៩៕
