ភ្នំពេញ៖ ឧកញ៉ា ថោង សារ៉ាត់ ដែលសមត្ថកិច្ចអះអាងថា ជាមេខ្លោងនៃអំពើឃាតកម្មសម្លាប់ ឧកញ៉ា អ៉ឹង ម៉េងជឺ ត្រូវបានប្រធានក្រុមប្រឹក្សាចៅក្រមជំនុំជម្រះ នៃសាលាដំបូងរាជធានីភ្នំពេញ លោក តុប ឈុនហេង នៅរសៀល ថ្ងៃទី២៦ ខែមីនា ឆ្នាំ២០១៩នេះ បានប្រកាសសាលក្រមផ្ដន្ទាទោសដាក់ពន្ធនាគារអស់មួយជីវិត រួមជាមួយបក្ខពួកចំនួន៤នាក់ ។
ក្រុមឧក្រិដ្ឋជនទាំង៥នាក់ ដែលត្រូវផ្ដន្ទាទោសដាក់មួយជីវិតនោះ រួមមាន៖ ទី១៖ លោក ថោង សារ៉ាត់ ជាមេក្លោង, ទី២៖ឈ្មោះ ស៊ាង វាសនា, ទី៣៖ឈ្មោះ មាស សម្បត្តិ, ទី៤៖ឈ្មោះ កុយ ចាន់ថុល និងទី៥៖ឈ្មោះ ឈុំ ចិត្រា។
ក្រុមគ្រួសារសាច់ញាតិរបស់ក្រុមឧក្រិដ្ឋជនទាំង៥នាក់នេះ កំពុងតែធ្វើការតវ៉ា និងបិទផ្លូវសាធារណៈ នៅមុខសាលាដំបូងរាជធានីភ្នំពេញ ជំទាស់ ចំពោះការសម្រេចរបស់តុលាការ។
ហេតុការណ៍បាញ់សម្លាប់លោកឧកញ៉ា អ៉ឹង ម៉េង ជឺ ដ៏កក្រើករាជធានីភ្នំពេញនេះ បានកើតឡើង កាលវេលាម៉ោង៧និង១៨នាទីយប់ ថ្ងៃទី២២ ខែវិច្ឆិកា ឆ្នាំ២០១៤ លោកឧកញ៉ាចុះពីរថយន្ត ឡិចស៊ីស៥៧០ ដើម្បីទៅទិញផ្លែឈើនៅមុខហាងលក់ផ្លែឈើ ឡោ តិចសេង ស្ថិតនៅផ្លូវលេខ២៧៤ សង្កាត់ទួលស្វាយព្រៃទី២ ខណ្ឌចំការមន រាជធានីភ្នំពេញ ៕
ប្រភព៖ CEN
