ក្រុងសៀមរាប៖ ទោះបីឪពុកម្តាយមានជីវភាពក្រលំបាកមែនក្តី តែទឹកចិត្តខិតខំសង្វាតរៀនសូត្រ មិនបានបាត់បង់ការព្យាយាមនោះឡើយ ទើបរុញច្រានឲ្យយុវតីពីររូប ដែលជាកូនស្រីរបស់លោកពូ ដៀប បានខំប្រឹងរៀនសូត្រក្លាយជាសិស្សពូកែ និងបានប្រឡងចប់បាក់ឌុបបាននិទ្ទេស A ទាំងបង និងប្អូន គឺកូនស្រីបងឈ្មោះ ដៀប សុធារី ជាប់បាក់ឌុបឆ្នាំ២០១៦ និងកូនស្រីទី២ ឈ្មោះ ដៀប ស្រីនិច ជាប់បាក់ឌុបឆ្នាំ២០១៨។
តែស្នាមញញឹមលាយដោយទឹកភ្នែកនៃញើសឈាមដែល ឪពុកម្តាយបានផ្តល់ឲ្យកូនស្រីពិតជាមានតម្លៃពិតមែន គឺពួកគាត់រំភើបរហូតដល់យំផងសប្បាយចិត្តផង អោបកូនៗផងដោយឃើញកូនៗខំតស៊ូរហូតបានប័ណ្ណកិត្តិយសជាច្រើនតាមពាក្យ ដែលកូនបានសន្យាជាមួយពួកគាត់។ តែពិភពលោកដ៏ស្រស់ស្អាត បានតែភ្លែតសោះក៏ភពខ្មៅងងឹត ក៏មកគ្របដណ្តប់លើក្តីសង្ឃឹមរបស់ប្អូនស្រីក្រោយពីឪពុកលាចាកលោក ទៅដោយជំងឺបេះដូង កាលពីខែវិច្ឆិកា ឆ្នាំ២០១៨ ខណៈក៏មានជំងឺជាប់ខ្លួនត្រូវការប្រាក់ព្យាបាលជំងឺទៀតផង។
បើតាមសម្តីរៀបរាប់ត្រួសៗតំណាងសមាគមឧត្តមគតិកូនខ្មែរដែលបានជួយផ្សព្វផ្សាយពត៌មានបង្ហោះតាមហ្វេសបុក និងបានទៅស្វែងរកក្មេងស្រីនេះដល់លំនៅដ្ឋាន កន្លងមកនោះ បានឲ្យដឹងពីផលលំបាក និងការខកបំណងរបស់ក្មេងស្រីទាំង២ ដែលសុទ្ធតែរៀនពូកែ ហើយបាននិទ្ទេសA ពីការប្រឡងបាក់ឌុបដូចគ្នាជាសិស្សរៀននៅវិទ្យាល័យ ១០ មករា ១៩៧៩ នៅខេត្តសៀមរាប។
តំណាងសមាគមឧត្តមគតិកូនខ្មែរបន្តថា៖ «ចាប់តាំងពីឪពកុពួកប្អូនស្រីទាំង ទទួលមរណភាពទៅ ប្អូនទាំងពីរហាក់ដូចជាខកបំណង ដែលជាក្តីសង្ឃឹមចង់បន្តការសិក្សាថ្នាក់មហាវិទ្យាល័យនៅភ្នំពេញ។ ដោយប្អូនស្រីបងឈ្មោះ ដៀប សុធារី ដែលជាសិស្សនិទ្ទេស A ជាប់បាក់ឌុបឆ្នាំ២០១៦ នោះ កាលពីមុននាងមានក្តីស្រមៃចង់រៀនមហាវិទ្យាល័យ តែឥឡូវនេះ នាងបានសម្រេចចិត្តចូលរៀនវគ្គបណ្តុះបណ្តាលគ្រូមធ្យមនៅគរុកោសល្យភូមិភាគខេត្តបាត់ដំបង។ ដោយសារខាងនេះ គេទទួលគាត់ឲ្យចូលរៀនដោយឥតបង់ប្រាក់ព្រោះគាត់មាននិទ្ទេសA ដោយគ្រាន់តែចំណាយថ្លៃចាយវាយផ្ទាល់ខ្លួន និងទិញសៀវភៅតែប៉ុណ្ណោះ។ ចំណែកប្អូនស្រី ដៀប ស្រីនិច ដែលទើបតែចប់បាក់ឌុបឆ្នាំ២០១៨ បាននិទ្ទេសA ដែរនោះ ក៏នៅពុំទាន់សម្រេចចិត្តយ៉ាងណាឲ្យច្បាស់ឡើយ ទំនងជាប្អូនអាចសម្រេចតាមបងស្រី។ ហើយពួកគេ ក៏នឹងត្រូវរើទីលំនៅឋានមករស់នៅតំបន់ក្បែរសាលារៀនវគ្គគ្រូផងដែរ នាពេលឆាប់ៗនេះ»៕ Piseth – Baykdang
