ភ្នំពេញៈ ថ្មីៗនេះ គេឃើញតារាសម្តែងស្រីកញ្ញា មាន សូនីតា ដែលទទួលបានងារពីមហាជនថា «រាជិនីក្រមា» កញ្ញា មាន សូនីតា ចាប់បានដៃគូរកស៊ីធំមួយ នៅប្រទេសជប៉ុន សម្រាប់ផលិតផលច្នៃពីក្រមារបស់នាង។
បើតាមសារ ដែលកញ្ញា មាន សូនីតា បានបង្ហោះអមនឹងរូបភាពដំណើរកម្សាន្តនៅប្រទេសជប៉ុនរបស់នាងនាពេលថ្មីៗនេះ ដោយមានសរសេរប្រាប់ថា៖ «អរគុណបង ដែលបានអញ្ជើញខ្ញុំទៅជប៉ុន ហើយទទួលយ៉ាងកក់ក្តៅ ព្រមជាមួយការចុះសន្យាជាមួយផ្ទះស្រឡាញ់ និងមានលក់នៅប្រទេសជប៉ុនឆាប់ៗចា!Business Trip ផ្ទះស្រឡាញ់# SlanhHouse JP»។
យ៉ាងណាសម្រាប់ការធ្វើកិច្ចសន្យាជាមួយដៃគូរកស៊ីថ្មី ថាតើជា ពាណិជ្ជករជាតិជប៉ុន ឬពលរដ្ឋខ្មែររស់នៅជប៉ុន ឬការរកស៊ីនោះមានទំហំប៉ុនណាទេ ក៏មិនត្រូវបានគេដឹងច្បាស់ឡើយពីតារាសម្តែងស្រីល្បីខាងថតស្ប៉តពាណិជ្ជកម្ម និងជាថៅកែស្រីទាំងវ័យក្មេងក្នុងរបរបើកហាងលក់សម្លៀកបំពាក់ និងគ្រឿងអនុស្សាវរីយ៍ពីក្រមានោះ ព្រោះប្រព័ន្ធទូរសព្ទរបស់នាងតេចូល តែគ្មានអ្នកលើកទទួល។
ដោយឡែកពេលថ្មីៗនេះ បើតាមរយៈសកម្មភានៃរូបថតទាំងឡាយ ដែលបានបង្ហោះតាមបណ្តាញសង្គមទាំងហ្វេសប៊ុក និងអ៊ីនស្តាក្រាមនោះ ឃើញថា កញ្ញា មាន សូនីតា ហាក់មានភាពសប្បាយចិត្តខុសពីធម្មតា ហើយក៏ចូលចិត្តបង្ហើរសារប្លែកៗ បែបជាមនុស្សស្រីនៅមានវ័យក្មេង ថែមទាំងធ្វើឬកឃ្យូតៗទៀតផង។
ពីគណនីហ្វេសប៊ុកខ្លួនឯងផ្ទាល់នោះកញ្ញា មាន សូនីតា បានបង្ហើរសារថា៖ «ហាហា!ថ្ងៃនេះម៉ាក់មកប្រាប់ថា មានគេចង់ដណ្តឹង។ គិតម៉េចទៅ ហាហា?»។ សារនេះធ្វើឲ្យប្រិយមិត្តអ្នកគាំទ្រ និងមហាជនមានការចាប់អារម្មណ៍យ៉ាងខ្លាំង រហូតកើតជាប្រធានបទដ៏សំខាន់យកមកជជែកគ្នាដោយមានទាំងជាអ្នករុញទូកបណ្តោយទឹក និងមានទាំងជាអ្នកយកជើងរាទឹកផង៕
